Eusko Legebiltzarreko bilkura:

Eskola jantokien kudeaketa eredua berraztertzea eskatu diote Jaurlaritzari

  • Jantokien “kudeaketa berritzaile eta desezentralizatua” egin nahi duten ikastetxeei “aukera bideragarriak” eskaintzeko eskatu du Eusko Legebiltzarrak aho batez.

ARGIA @argia
2019ko urriaren 24a
(Arg.: Bekobenta)

Eskola jantokia hezkuntza komunitatearen barruko zerbitzu bat dela defendatzen duten eragileek norabide horretan babes bat gehiago izango dute, Eusko Legebiltzarrak ostegunean onartutakoa betetzen badu Eusko Jaurlaritzako Hezkuntza sailak.

Hasiera batean Elkarrekin-Podemosek aurkeztutako mozioarekin bat egin dute talde guztiek, zuzenketa batzuk egin ondoren. Hala, onartutako testuak eskatzen du lau hilabeteren buruan egin dadila azterketa bat jantokiak zuzenean kudeatzeko adjudikazio baldintzak hezkuntza komunitate osoarekin adosteko.

Era berean, Eusko Jaurlaritzak sukaldeak eraikitzea bermatu behar du hala aukeratzen duten ikastetxeen kasuan eta kudeaketa eredu dezentralizatu desberdinen azterketa ere egin behar du. EAEko araudi berriak 2020-2021 ikasturterako martxan egon beharko luke, aho batez talde guztiek onartutakoaren arabera.

Norena da ardura?

EAEko ikastetxeetan Eusko Jaurlaritzak bultzatutako jantoki zerbitzu ereduak kritika ugari izan du azken urteetan, sukaldeak desagerrarazi dituelako eskoletatik, catering enpresen mesedetan. Kritikak, jakien kalitatea zalantzan jartzeaz gain, elikadurari eta jantokiei hezkuntzarako ematen zaien funtzioa ere izan du jomugan.

Horren aurrean, 2019ko urtarrilean Hezkuntza Sailak proposamena egin zuen, hala nahi duten ikastetxeek jantokiak zuzenean kudeatzeko. Baina proposamen horrekin ez dira konforme hezkuntzako eragile ugari, kudeaketa guztia guraso elkarteen esku utzi bai, baina bitartekorik eta laguntzarik ez duelako eskaintzen horretarako: “Ez zaigu egokia iruditzen. Jantokia zerbitzu publiko bat da, beraz, Eusko Jaurlaritzak dagokion ardura hartu beharko luke”, azaldu zion ARGIAri Lurdes Imaz EHIGE guraso elkarteko koordinatzaileak.

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!


Hezkuntza kanaletik interesatuko zaizu...
Azkenak
EGILEA
Eguneraketa berriak daude