Cornelius Drebbel (1572-1633) asmatzaile holandarrak eraiki zuen historiako lehen itsaspekoa. Jakue I.a Ingalaterrako erregeak asmatzaile gisa kontratatu zuen eta Drebbelek horrelako itsaspeko ontziak etorkizun handia zutela ulertarazi nahi izan zien Britainiar Armadako kideei.

Arrantzontzi bat hartu, egurrezko estalkia ipini eta dena larru koipetuaz estali zuen asmatzaileak. Tramankulua hamabi arraunlarik mugiarazten zuten, arnasteko hodi bat erabiltzen zutenak.

Ontzi bitxiak lehen urpeko bidaia Tamesis ibaian egin zuen 1620an edo 1621ean, eta hamabi oineko sakonerara iritsi zen (3,6 metro, gutxi gorabehera). Badirudi erregeak gogo onez hartu zuela erakustaldia, baina Britainiar Armadak ez zion gailuari erabilera militarrik aurkitu eta Drebbelen ekimenak beste hiru mende behar izan zituen aurrera egiteko.