Sorgin-ehizaren historiaz I. topaketa feministak Iruñean

  • Sorginak, kapitalismoa eta emakumeen aurkako indarkeria landuko dute Iruñean martxoaren 22tik 24a. Sorgin-ehizaren historiari buruz eztabaidatuko dute eta emakume-talde ugarik lan-sare bat eratzea da antolatzaileen asmoa, aurrera begira, gainontzeko herri eta hirietan antzeko ekintzak antolatzen hasi asmoz. Izen ematea eta informazio gehiago hemen


2019ko martxoaren 21an - 10:02

Ondorengo oharraren bidez iragarri dituzte topaketak:

Ez dugu sekula jakingo zenbat pertsona exekutatu zituzten espainiar estatuan sorginkeria egotzita, gertakari haiek jaso zituzten dokumentu asko suntsituak izan direlako. Halere, gaur egunera arte iritsi diren dokumentuen argitan, badakigu mende bakarrean, 1535-1650 urteen bitartean, 300 pertsona baino gehiago atxilotu zituztela Euskal Herrian, Katalunian eta Aragoin, gehienak emakumeak. Gainera, haietako asko bortizki torturatu zituzten, eta jendaurrean urkatu edo bizirik erre. Europan, orotara, hamarna mila pertsona izan ziren erailak.

Sorgin-ehiza, botere zibilek eta Elizak sustaturiko emakumeen hilketa izugarri hura, ikusezina izan da orain arte. Silvia Federici historialari eta ekintzaile feminista ezagunak erakutsi zuen, Caliban eta sorgina liburuan, sorgin-ehiza funtsezko prozesu bat izan zela garai modernoaren eta gizarte kapitalistaren bilakaeran, harreman komunalak desegin zituelako eta emakumeak diziplinatu zituelako gizartean leku berri bat onar zezaten (hau da, lan-indarra produzitu eta zaintzen duten langile ikusezinak izan zitezen).

Gaur egun, ikusten dugu ezen emakumeak erailak izan ziren toki askotan mitologiaren eta folklorearen bidez oroitzen dituztela jazoera haiek, batzuetan baita modu jostagarrian ere, eta, askotan, jazarleengandik jasotako ikonografia erabiliz. Hala, emakumeek jasandako indarkeria hutsaldu eta haren arrazoi historikoak ezkutatzen dituzte. Iaz, “Sorginkeria egotzita hil zituzten emakumeen memoriaren alde” izeneko kanpaina abiatu genuen. Geroztik, hainbat emakume-talde elkartu dira, Espainiako sorgin-ehizaren inguruko materiala irakurri eta haren gainean eztabaidatzeko, halaber gertaera haiek gaur egungo egoerarekin duten lotura aztertzeko.

Eztabaida horretan sakontzeko, eta emakume-talde haien artean lan-sare bat eratzeko, sorgin-ehizaren historiari buruzko lehen topaketa feminista hau antolatu dugu. Iruñean egingo dugu, martxoaren 22-24 bitartean. Beraz, zuen denbora, gorputz, bihotz eta buruaren zati bat ikerketa-prozesu honi eskaini nahi badiozue, jardunaldi honetan parte hartzeko deia egiten dizuegu. Gero, antzeko ekintzak antolatu ahal izango dituzue zuen herri eta hirietan, sare horretan parte hartuko duten lan-taldeak martxan jartzeko.

Egitaraua egunez egun

Martxoaren 22an, ostirala, hasierako hitzaldia izango da, Silvia Federiciren eskutik. Sarrera dohainik izango da, aretoa bete arte (600 lagun).

Martxoaren 23an, larunbata, lan-saioak eta trebakuntza-saioak egingo ditugu. Helburua da espainiar estatuko sorgin-ehiza eta haren memoriaren irudikapena ikertzea; beraz, arlo horretan interesa duten pertsona eta taldeei zuzenduta dago. Izena eman behar da (150 lagun).

Martxoaren 24an, igandea, Zugarramurdira eta Sarara joango gara, hango museoa eta leizeak ikustera. Sorgin-ehizaren memoriaren irudikapena aztertuko dugu, eta, “Sorginkeria egotzita eraildako emakumeen memoriaren aldeko manifestua” aintzat harturik, instituzioak interpelatuko ditugu. Hurrengo egunetan, irteera horretan parte hartzeko deialdi publikoa egingo dugu; izena ematen dutenek, joan-etorria autobusez egiteko aukera izango dute.

Izen ematea eta informazio gehiago hemen


Kanal honetatik interesatuko zaizu: Feminismoa
Gorputz hotsak
“Baimenik eskatu gabe interbentzio kirurgiko ugari egin zizkidaten”

Aktibista intersexa* eta DJa da Marikarmen Free (Baena, Espainia,1984). 2003. urtean sistema psikiatrikoaren kontrako borrokan hasi zen, eta gaur egun bide beretik doa Insania kolektibokoekin. Martxoan, Iruñeko Katakraken egindako “Zapalkuntza psikiatrikoa eta... [+]


2024-06-19 | June Fernández
Irantzu Varela, komunikatzaile feminista
“Erreparazio zein mendeku ariketa bat da nire eleberria”

Lo que quede (euskaraz 'geratuko dena', Continta me tienes argitaletxea) liburuan bere senar ohiaren tratu txarrak eteteko prozesua harilkatu du eguneroko indarkeria matxisten kontakizunekin, eta bere bizitzako emakumeekin batera eraiki duen orainaldi gozagarriaren... [+]


Historiari eta esklerosi anizkoitzari buruzko irakaspenak

Mallorca, 1968. Joana Maria Escartin historialaria jaio zen. 1989an esklerosi anizkoitza diagnostikatu zioten eta joan den maiatzaren 30ean hil zen jaioterrian, 56 urte zituela, hain zuzen, esklerosi anizkoitzaren nazioarteko egunean.

Ikasketak UIBn (Universitat de les Illes... [+]


Ekofeminismoaz, motozerra eskutan

Duela hilabete inguru, unibertsitateko kide gizonezko baten liburu aurkezpenean ginela, egoera bitxi samarra gertatu zitzaigun. Ekologiari buruzko liburua zen eta erreferentzien artean hainbat pentsalari ekofeminista zeuden. Egileak, baina, inongo momentuan ez zuen aipatu... [+]


Eguneraketa berriak daude