Nerea Melgosa Eusko Jaurlaritzako Gazteria sailburuak emandako azken datuak dira, PPk eskatuta Eusko Legebiltzarrean azalpenak eman dituenean. Urriaren 10eko agerraldian, Melgosak adierazi zuen Euskal Udalekuek administrazioari jarduera “ezkutatu” ziotela eta Jaurlaritzak “jarraipena egiteko aukerarik” ez duela izan. Euskal Udalekuak ekimen “klandestinotzat” jo zituen. Euskal Udalekuek, ordea, ageriko jarduera dute: sare sozialetan daude eta Nafarroako Gobernuak diruz laguntzen ditu, bi udaleku Abaigarren eta Goñin baitaude. Arabako Foru Aldundiak Eusko Jaurlaritzaren tesia defendatu du. Gipuzkoako Foru Aldundiak, berriz, tutoretzapeko haurrak bidali izan ditu udalekuotara.

Melgosaren ustez, “gertatu dena argitzea” da lehentasuna, eta adingabeak babestea. Haurren segurtasuna “marra gorria” dela esan zuen eta “inoiz ez zutela halakorik” bizi behar. Protokoloak berrikusiko dituztela gaineratu zuen.

Bingen Zupiria Eusko Jaurlaritzako Segurtasun sailburuak Euskadi Irratian urriaren 8an egindako adierazpenak jaso ditu Berria egunkariak. Zupiriaren iritziz, familiek eskubidea daukate udalekuetako “harremanak nolakoak diren” jakiteko, eta neurri berean, gurasoek jakin behar dute “nora bidaltzen dituzten” seme-alabak.

Euskal Udalekuetako hezitzaileek, urriaren 3an, agerraldi jendetsua egin zuten Bergaran (Gipuzkoa). Azaldu zuten edozein eraso “erabat” gaitzesten dutela eta prest agertu ziren, beren artean erasotzailerik balego, “neurriak hartzeko”. Egun berean, Euskal Udalekuen aurka eskuinak abiatutako lintxamendua salatu zuen mugimendu transfeministak. Mugimendu transfeministaren ustez, Bernedoko udalekuen inguruko gezurrak hedatu dituzte eskuin muturrak eta sektore erreakzionarioek. “Lintxamendu kanpaina” eta “eraso antolatua” olatu erreakzionario orokorrago baten markoan kokatu zituzten. Sexu-genero disidentzia haurren aurkako erasoekin lotzea salatu zuten. Udalekuetako begiraleei elkartasuna eta babesa adierazi zieten.