Hitzokin hasi du bere mintzaldia Tedros Adhanom Ghebreyesusek: "Sinesteak lana duen arren, orain dela bi hilabete guretzako erabat ezezaguna zen 2019nCoV koronabirusa, geroztik hainbeste eragin duena hedabideetan, ekonomian eta lider politikoengan. Orain arteko kasuen %99 Txinan gertatu den arren, jarraitzen du larrialdi bat izaten herrialde horrentzako baina baita ere mehatxu oso larria gainerako munduarentzako. Koronabirusaren erasoak erronka botatzen digu hainbat alorretan proban jarriz. Batetik gure solidaritate politikoa: ea mundua gai izango den elkar hartzeko ez mugarik eta ez ideologiarik ezagutzen ez duen etsai komunaren aurrean. Gure solidaritate ekonomikoa ere frogarazten digu: ea prest gauden gaur dirua inbertitzeko 2019nCoV honen erasoari aurre egiteko, ala nahiago dugun geroago horren kalteak kudeatzen pagatzea. Eta solidaritate zientifikoa: iritsiko ote da mundua elkarrekin partekatzen ditugun arazoen erantzunak elkarrekin partekatzera?

Genevako bileraren atarian aurreikuspen ezberdinak azaldu dira adituen artean. Txinan 2003ko SARS izurriari aurre egiten asmatu zuenetik heroitzat daukaten eta gaur ere agintarien aholku emaile nagusia den Zhong Nanshan doktoreak uste du otsailaren erdi-amaiera alderako gaindituta egongo dela izurri berriaren okerrena eta apirilerako arazoa itxita:

Oso bestela, Hong Kongeko unibertsitatean osasun publikoko katedraduna den Gabriel Leung, hau ere munduko aditu nagusietakotzat joa, beldur da 2019nCoV iritsi daitekeela munduko biztanleen %60a kutsatzera, baldin eta ez badira denetan hartzen Txinan ikusten ari garenak bezalako isolamendu eta kontrol neurri zorrotzak.

Asteartean, Johns Hopkins zentroak uneoro daraman kontabilitatearen arabera, honela dago 2019nCoV izurritearen egoera: hildakoak milakoa gaindituta 1.018 dira eta kutsatuak 43.138.