Txinan herritarrak gero eta indar handiagoz ari dira protestan. Zero COVID politikarekin haserre, Xi Jinping agintariaren aurkako mezuak plazaratzen ari dira, aspaldiko urteetako protestarik jendetsuenetan. Urumqi hirian, Txina ipar mendebaldean, sute bat izan zen azaroaren 24an, eta bertan itxialdian zeudenez, hamar lagun hil ziren.

Gertakari horrek herritarrak areago sutu ditu, eta asteburuan hiri nagusietan kalera atera dira, Pekinen ez ezik Shanghain, Nanjingen eta Wuhanen ere bai. Gobernuak koronabirusaren aurrean hartu dituen neurriak kentzeko eskatzen dute, batik bat kalte ekonomikoak nahiz psikologikoak eragin dituelako. Orri zuriak erakusten dituzte manifestariek, Xiren gobernuaren “zentsura” salatzeko, eta protestaren sinbolo bilakatu dira. Nazioartean zabaldu da mezua Alderdi Komunistaren gainbehera izango ote den, baina adituek ezeztatu egin dute hori.

Poliziaren errepresioa gaitzetsi dute manifestariek zein nazioarteko hainbat hedabidek. Tartean, BBC Erresuma Batuko kateak salatu du euren kazetari bat zazpi orduz izan dutela atxilo, eta haren arabera, poliziek kolpatu egin dute.

Zer da zero COVID?

Txinak zero COVID estrategia hautatu zuen birusa “ahalik eta azkarren” desagerrarazteko, eta horretarako itxialdi zorrotzak eta kontrol neurri gogorrak ezarri dituzte. Kutsatze bat dagoen aldiro, inguruko milaka lagun konfinatzera behartzen dituzte, asteetarako, askotan; herri osoak ere ixten dituzte. Esaterako, deigarria izan da munduko iPhone fabrikarik handienean 200.000 langile konfinatuta egon direla, fabrika itxi dutelako dozena bat kutsatze atzemandakoan.

Gobernuak estrategia hori babesten segitzen du, esanez bestela milioika pertsona hilko liratekeela, baina herritarrek ezin dute gehiago jasan. Aipatzekoa da Txinan inoizko kutsatze daturik okerrenak dituztela pandemia hasi zenetik. Ia bi milioi lagun daude itxialdian.