ARGIA.eus

2020ko abuztuaren 11

Zahar egoitzetako hilotzen eskandaluagatik ikertuko duten enpresetako batek 12 egoitza ditu Euskal Herrian

  • Eskandalua lehertu da Espainiako Estatuan, armadak hainbat hilotz aurkitu ostean zahar egoitzetan, abandonatuta. Fiskaltzak ikerketa ireki du besteren artean, horietako batzuk kudeatzen dituen DomusVi multinazionalaren aurka. Enpresa horrek hainbat herrialdetan kudeatzen ditu zentroak. Espainiako Estatuan 198; Euskal Herrian 12.

Lander Arbelaitz Mitxelena @larbelaitz
2020ko martxoaren 25a
Militar bat zaharren egoitza bat desinfektatzetik irteten.

"[Espainiako] Armadak, zenbait bisitatan, zaharrak ikusi ditu guztiz abandonatuta, batzuetan hilda, beren oheetan", adierazi zuen astelehenean Margarita Robles Espainiako Defentsa ministroak. Estatuko fiskal nagusiak jakinarazi du ofizioz ikerketa abiatuko duela informazioa biltzeko, gertatutakoa argitzeko eta "gertaeren larritasunak gailentasun penal posiblerik" duen jakiteko.

Defentsa Ministerioak ondoren jakinarazi zuen hainbat izan zirela gorpuak aurkitu zituzten zaharren egoitzak, zehaztu gabe zenbat eta non. El País-en artikulu honetan jaso dutenez, egoitza horietan birusa detektatu ostean pertsonal ugarik baja hartu zuen.

Osasun iturriek azaldu dutenez, zaharren egoitzetan hiltzen direnen gorpuak gela hotz batera eraman ohi dituzte, eta bertan egoten dira hileta-zerbitzuek jaso bitartean. Hala ere, heriotza Covid-19ren ondorio izan dela sumatzen denean, protokoloak ezartzen du ez direla ukituko medikuak eta ehorztetxeko langileak iritsi arte, poltsa eta ekipo bereziz hornituta, eta bitartean gorpua ohean egongo dela. El País-ek dioenez, Madrilgo hileta-zerbitzuak kolapsatuta dabiltza eta 24 ordu behar dituzte gorpuen bila joateko.

DomusVi enpresari espedientea

Otsailean Madrilgo Userako zahar egoitza kudeatzen zuen DomusVi multinazionalari espedientea ireki zioten. "Zikinkeria, egoera txarrean zeuden gelak, altzairuak hautsita, labezomorroak eta osasun arreta ezdeusa ziren hauen senideek eta langileek pairatu beharreko kontuetako batzuk", Telemadriden albiste honetan irakur daitekeenez.

El País egunkarian Usera auzoko zaharren egoitzako iturriekin hitz egin dute eta bertako bi langilek adierazi dute bertan militarrek gorpu bat gutxienez aurkitu zutela. "Bertan egon zen arratsaldeko lehen orduetatik. Ni gauez iritsi nintzen, eta hurrengo eguneko zortzietan hor jarraitzen zuen".

DomusVi multinazionalak Euskal Herrian

Enpresa honek hamar egoitza kudeatzen ditu Hegoaldean eta bi Iparraldean.

Bilbon hiru dituzte: Erribera kalean DomusVi Ribera 191 plazarekin; Txurdinagan DomusVi Arbide, 50 plazarekin; Santutxun Miraflores, 139 plazarekin.

Galdakaon bat, DomusVi Aperribai, 48 plazarekin.

Arrigorriagan bat, DomusVi Arandia, 132 plazarekin.

Gasteizen bat, DomusVi Ariznabarra, 140 plazarekin. Egoitza honetan bi kasu positibo gutxienez badaude.

Lapurdiko Getarin bat, Eskualduna.

Angelun bat, Arpège.

Bat Donostiako Gros auzoan Villa Sacramento, 122 plazarekin.

Lasarte-Orian Atsobakar egoitza 57 plazarekin.

Pasai-Antxon DomusVi Berra  (webgunea ez dabil),  Berratxo Bidean.

San Adrian herrian bat, San Adrian egoitza, Nafarroan, 138 plazarekin.

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal hauetan artxibatua: Koronabirusa  |  Donostia  |  Bilbo  |  Angelu  |  Lasarte-Oria  |  Galdakao  |  Arrigorriaga

Koronabirusa kanaletik interesatuko zaizu...

Azkenak
EGILEA
Argia buletina
Egunaren laburpena
zure e-postan
Eguneraketa berriak daude