Euskarazko murgiltzea duten haurtzaindegiak aukeratzen dituzten guraso askok ez du horretarako aukerarik Ipar Euskal Herrian, eskaintza txikiagoa baita eskaera baino. Arazoari irtenbidea eman eta indarrak batzeko elkartea sortu dute haurtzaindegi eta haurtzain-etxe euskaldunek: Konkolotx.
Zortzi dira Ipar Euskal Herrian umeei euskarazko harrera egiten dieten haurtzaindegi eta haurtzain-etxeak: Biarritzeko Ohakoa, Hendaiako Txiki Txoko, Baionako Luma, Angeluko Xoko Ttipi, Mauleko Xübükota, Lakarrako Ttinka, Ziburuko Ttuku Ttuku eta Azkaingo Kilima. Duela bi urte erabaki zuten sarea osatzea, elkar laguntzeko eta esperientziak trukatzeko. Orain, bide horretan urrats bat gehiago eman eta elkartea sortu dute: Konkolotx.
Eskaintza txikia euskaraz
Elkarteko kideek azaldu dutenez, Iparraldeko haurtzaindegien %29 Hirigune Elkargoak eta Euskararen Erakunde Publikoak kudeatzen duten label sistemaren barruan daude eta gehienak haurtzaindegi elebidunak dira. Tokien %5 baino gutxiago eskaintzen da murgiltzean. Haurtzain-exeen kasuan, %18k funtzionatzen du murgiltze ereduan (28tik 5 dira euskaldunak).
Eskaera, baina, eskaintza baino handiagoa da. Kideen hitzetan, seme-alabak euskarazko egituretan nahi dituzten gurasoen eskaerek “gainezka” dituzte, eta beraz, “haurrak murgiltzean ezarri nahi lituzketen hainbat gurasok beste sistema batzuetan ezarri behar dituzte: elebidun ala frantses elebakar”.
"Hizkuntzaren transmisioa 3 urte aitzin hasten da eta murgiltzea da transmisioa segurtatzeko eredu eraginkorrena"
Elkarteak garbi ditu helburuak: elkarren arteko ezagutza, trukaketa eta sostengua mantentzeaz gain, Iparraldean lehen haurtzaroko harreran murgiltzea garatu behar dela aldarrikatzen dute. Horretarako, euskalgintzako beste egiturekin elkarlana abiatuko dute eta euskarazko harrera garatzeko behar diren medioak hartzea eskatu diete Euskararen Erakunde Publikoari eta Hirigune Elkargoari, murgiltzean funtzionatzen duten haurtzaindegiak sortzen lagundu dezaten edota euskara hutsezko harrera guneak antolatu ditzaten. Langileak euskalduntzeko formakuntza indartzea ere eskatu dute.
Hizkuntzaren garrantzia lehen urteetan
“Familia guziek euskarazko harreraren hautua egiteko aukera ukan behar lukete”, diote Konkolotxeko kideek. Azken finean, “hizkuntzaren transmisioa 3 urte aitzin hasten da eta murgiltzea da transmisioa segurtatzeko eredu eraginkorrena”.
Ramadana bukatzear zela sortu zen zalantza irakasleen artean: familia musulmana duten ikasle batzuek adierazia zuten, ramadanaren amaieraren ospakizuna zela eta, ez zirela egun horretan joanen gelara. Ekintza horren bidez –aipatu zuen irakasle batek– argi gelditzen... [+]
EHUko Gobernu Kontseiluak adierazpena onartu du, Palestinaren alde eta Gazako sarraskiaren aurrean. Hainbat konpromiso hartu ditu, besteak beste, boluntariotza programa bat martxan jartzea, errefuxiatuen arreta zabaltzea eta giza eskubideen inguruko gogoeta sustatzea. Harreman... [+]
Neskek gaitasun matematiko eta zientifikoekiko txikitatik duten pertzepzio, autopertzepzio eta bizipenen eraginez, zientzia arloko ikasketei muzin egin eta bestelako karrerak aukeratzen dituzte. Hala dio ikerketa berri batek.
EHUk Tel Aviv-eko unibertsitatearekin etorkizuneko lankidetzarako bideak ahalbidetzen dituen zibersegurtasuneko katedra bat sortu izanaren harira, bertako langileok interpelatuak izan gara hainbat lekutatik, eta esan beharra dut neurri handi batean lotsatuta sentitu naizela,... [+]
Hirugarren urtez Xiberoako ikastolei bultzada emanen die Tulalaika bestak.