Demagun, esaterako, Londresen partida bat jokatzekoa dela, arratsaldeko 20:00etan. Taipei, Hong Kong edota Pekinen, goizaldeko 4:30en bueltan hasiko da. Hura telebistaz ikusi nahi duenak, hortaz, loari lapurtu beharko dizkio minutuak. Hurrengo egunean nekatuago egongo da, erreflexu gutxiago izango du, bolantean loak hartuko du...

Singapur, Guangzhou, Philadelphia, Seattle eta Ipar Karolinako unibertsitate banak elkarlanean egin dute ikerketa. 2012-2018 epealdian Ingalaterran, Espainian, Frantzian, Alemanian eta Italian jokatutako 12.700 partidaren eta Singapur eta Taiwanen gertatutako 2 milioi trafiko istripuren artean izan zitekeen lotura aztertu dute. Singapurreko trafiko istripuei dagokienez, taxi konpainia nagusien datuak hartu dira aintzat.

Ikerketaren egileek diotenez, urtean, taxi-gidariak tartean izan diren 370 istripu baino gehiagoren "erantzulea" izan daiteke futbola Singapurren. Eta Taiwanen, 41.000 istripurena.