12.000 lagun inguru batu ditu Udineko kaleetan egin den manifestazioak. Italia-Israel partida bertan behera uzteko eskatu dute, baita Israel nazioarteko txapelketetatik kanporatzeko ere, besteak beste. Manifestazioa, zeina modu baketsuan egin den ibilbide ia osoan zehar, Primo Maggio plazara heldu denean, dozenaka lagunek Poliziak ezarritako hesiaren aurka egin dute –futbol estadiora hurbiltzeko asmoz–, eta orduan hasi dira enfrentamenduak.

Udineko Polizia buru Pasquale Antonio De Lorenzok adierazi duenez, ehun bat manifestarik segurtasun indarren ibilgailuei eraso egin diete, eta poliziek ur-kanoi eta gas negar-eragileekin erantzun dute. Hogei bat lagun atxilotu dituzte. Poliziaren presentzia nabarmena izan da egun osoan, hainbat dronek egin dute hegan Friuli estadioaren inguruan, eta frankotiratzaileak ere jarri dituzte hango teilatuan, partidak iraun bitartean.

2026ko Munduko Futbol Koparako sailkapen faserako partidan, Italia 3-0 nagusitu zaio Israeli. Partida hasi aurretik, estadioan ziren ikusleetako batzuek txistu egin diote Israelgo ereserkiari.