Nafarroako Justizia Auzitegi Nagusiak 2005ean aztertu zuen kasua eta Euskalerria Irratiaren aldeko epaia eman zuen. Nafarroako Gobernuaren eta Opus Deiren bi irratien helegiteak atzera bota ostean Gorenak epaia berretsi du orain.

1998ko lizentzia banaketako lehen fasean Euskalerria Irratia Net21 eta Radio Universidad de Navarra irratien aurretik zihoan puntuazioetan. Baina bigarren fasean lizentziarik gabe utzi zuen. Azken hori da epaile batek hirugarrengoz prozesua irregulartzat jo eta baliogabetu dutena.

Aspaldiko afera

1990ean FMko irrati lizentzien lehenbiziko banaketan, Nafarroako Gobernuak baimenik gabe utzi zuen Iruñerriko irrati euskalduna.

Zortzi urte geroago, 1998ean lizentzien banaketa egin zuen berriro ere Nafarroako Gobernuak, eta Euskalerria Irratia lizentziarik gabe utzi zuen. Eta erabaki horren kontrako helegitea jarri zuen Donibane auzoko Irrintzi Dorreko irratiak.

2005ean helegitea onartu zuen Nafarroako Justizia Auzitegi Nagusiak eta baliogabetu egin zuen lizentzien banaketa. Hala ere, Iruñeko 91,4 frekuentziako irratiak ez zuen esleipena eskuratu.

2006an lizentziak banatzeko deialdia egin zen berriro eta Nafarroako Gobernuak aurreko bi irratien alde egin zuen orduan ere. Auzitara jo zuen Euskalerria Irratiak eta 2010ean banaketa hura baliogabetu egin zuen Nafarroako Justizia Auzitegi Nagusiak.

Orduko Nafarroako Gobernuko bozeramaileak, Alberto Catalanek, erabakia “errespetatzen eta onartzen” zuela jakinarazi zuen, baina horrek ez ziola eskumenik ematen Euskalerria Irratiari lizentziarik lortzeko.

2012an lizentziak lortzeko lehiaketa berria ireki zen eta 2013ko urtarrilean jakinarazi zituzten emaitzak. Euskarazko irratiak berriz ere ez zuen emisio baimenik eskuratu  SER eta COPE kateei eman zizkietelako.

Lasterketa luzea helmugara iristeko

Mikel Bujanda Euskalerria Irratiko zuzendaria pozik agertu da albistearekin arrazoi zutela eta haiek lizentziarik gabe uzteko erabakia irregularra izan zela berresten baitu epaiak.

Hala ere, ebazpena ez dela erabateko garaipena adierazi du: “Lasterketa luzea da hau, 1998an hasitakoa. Auzitegiaren erabakiaren ondotik berriro lasterketaren buruan goaz, irabazten ari gara, baina oraindik ez gara helmugara iritsi, oraindik ez daukagu lizentzia eskuan”.

Informazio gehiago:

Euskalerria Irratiaren 25.urteurrenaren harira lizentziarik gabe eta oztopo askoren gainetik euskaraz komunikatzen jarraitu duen irratiaren inguruko erreportajea.