Euskalerria Irratia: 25 urte Iruñerriko uhinak euskalduntzen

  •  1988an azaroaren 7an sortu zuten Euskalerria Irratia, Iruñerriko irrati euskaldun eta independentea. 25 urte daramatza uhinetan, Nafarroako Gobernuak emititzeko baimena ukatu dion arren.

     


2013ko azaroaren 07an - 00:00
Azken eguneraketa: 2015-02-26 13:37:33
Euskalerria Irratiaren sortzaileak, 1988an. (Arg: Euskalerria Irratia)

“Baietz 25. urteurrena legeztaturik ospatu”, hala dio hedabidearen web-guneak. Izan ere, ez da erreza Euskalerria Irratiaren egoera legala. Nafarroako Gobernuak lizentziarik gabe utzi du emititzeko baimenak banatu dituen lehiaketa guztietan; Euskalerria Irratiak, baina, uste du lizentzia izateko eskubidea duela, eta Espainiako Auzitegi Gorenera eraman du auzia. Bertan dago orain gaia.

Oztopoak oztopo, ekinean jarraitzen du Iruñerrian euskara hutsean emititzen duen tokiko irrati bakarrak. Astean 40 orduko programazioa eskaintzen du, eta CIESen inkesten arabera, 8.000 entzulek aditzen dute, batez beste.

“Bertako errealitateari erreparatzen diogu, jendearen poz eta nahigabeei, proposamen zein ekimenei, ez bakarrik Nafarroa ofizialari”, diote hedabidearen aurkezpen gutunean. Hori da irratiaren ezaugarri nagusietako bat: Iruñerriari eta Nafarroari buruz hitz egitea, baino gainontzekoek lantzen ez duten ikuspuntuetatik.

Bazkideei esker

Bazkidetzan oinarritutako proiektua da, alderdi politiko, erakunde ofizial eta indar ekonomikoen menpekotasunik gabekoa. “Jendeak sortu eta kudeatuta” dela diote bertako langileek, “independentea”.

Autonomia mantendu ahal izateko bazkide gehiago behar dituzte, eta horregatik, martxan paratu dute bazkidetza kanpaina.

Egun, 996 bazkide dituzte, eta urteurren egunarekin batera, 25 gehiago izatera heltzea da planteatu duten erronka.

Hastapenak: Euskadi Irratiaren antena pirata bat jartzen

Euskalerria Irratiak lehen urratsak 1988an eman bazituen ere, lau urte lehenago, 1984an, Iruñeko Komunikabideak sozietatea eratu zuten.

Elkartearen aurreneko ekimena ez zen izan irrati propio bat sortzea, baizik eta garaian hasiberria zen Euskadi Irratia Iruñerrian entzungai jartzea. Horretarako, etxe baten teilatuan antena bat ipini, eta euskaraz aritzen zen medio bat eskaini zioten eskualdeari: Euskadi Irratia.

Lehen pauso hori motz geratu zen baina. Eta besteena helaraztetik, tokian-tokiko egitasmo bat prestatzeari ekin zioten. Era horretan jaio zen Euskalerria Irratia.

“Hemengo jendeak entzule huts ez, hartzaile izateaz gainera, egile, hizlari, solaskide izan behar zuen”. Esan eta egin.

Hasiera batean agintariek emisio baimena eman arte itxarotea pentsatu zuten, aitzitik ez zieten ematen. Beraz, jada 25 urte iraun duen ibilbideari ekin zioten, nahi gabeko egoera alegalean. 

Twitterren #ie25 traolaren bidez ematen ari dira urteurrenaren berri.

 


Kanal honetatik interesatuko zaizu: Euskara
Zenbat kostatzen den euskaldun izatea

Euskara ikasi eta erabiltzen hasi nintzenean, berehala jabetu nintzen euskaldunentzat haietako beste bat gehiago bilakatu nintzela (gasteiztar euskaldun berria izanda azken bagoietakoa, baina barruan). Nire artean pentsatzen nuen Euskal Herria herri ederra zela; etimologikoki... [+]


2024-03-25 | Leire Artola Arin
Burbuilaren ostean badago zer erein

Irundik Baionara, ezin ezkutatuzkoa izan da 23. Korrikak eragindako harrotasuna. ‘Herri Harro’ leloak zentzua hartu duela ikusi dugu lekuko hartzaileen aurpegietan, eta atzetik euskararen alde oihuka aritu diren korrikalariengan. Bakoitzak bere gorputzetik eta bere... [+]


Eguneraketa berriak daude