Neolitoko giza irudi “berriak”
Jordaniako Kharaysin aztarnategian suharriz egindako dozenaka giza iruditxo topatu dituzte, duela 9.000 eta 10.000 urte ingurukoak, Juan José Ibañez buru duen Espainiako CSIC ikerketa agentziako arkeologo taldeak Antiquity aldizkarian jaso duenez.
Suharria lanabesak egiteko erabili ohi zuten, baina pieza horietan egindako hozkek ez dute erabilera praktikorik; gizakiak irudikatzea omen zen asmo bakarra, hau da, hozkek gizakien lepoa eta gerria markatzea, eta erritualetan erabiltzen zituztela uste dute adituek.
Berez, gizakiak pare bat milurte lehenago hasi ziren, animaliez gain, beren burua ere irudikatzen. Beraz, ez dira giza irudirik zaharrenak. Baina pieza hauen berrikuntza eta aurkikuntzaren balioa, materialean dago: aurkitu diren Neolitoko suharrizko lehen giza figurak dira.
