ARGIA.eus

2020ko apirilaren 08a
Elkartasuna

Sindikatuen "erresistentzia kutxatik" laguntza jaso duten langileak jo-puntuan jarri ditu Bizkaiko Ogasunak

  • Bizkaiko Aldundiko Ogasunak “erresistentzia kutxaren” laguntza jaso duten grebalarien inguruko informazio pertsonala eskatu die sindikatuei, jakiteko ea beharrezko erretentzioak egin dizkieten jasotako zenbatekoei. Hala, foru erakundeak azkenaldian greba erabakigarriak irabazteko funtsezkoa izan den tresnaren bihotzera jo du ustezko irregulartasun bila.

Urko Apaolaza Avila @urkoapaolaza
2018ko otsailaren 05a
Bizkaiko zaharren egoitzetako greban, emakume langileen inplikazio eta batasunaz gain, ezinbestekoa izan zen beste langileen elkartasuna \"erresistentzia kutxaren\" bidez. (arg: ELA)

Eldiarionorte.es egunkariak azaleratu duenez, Ogasuneko inspekzioak urtarrilaren 26an sinaturiko gutuna igorri die sindikatuei, “aurrekaririk gabeko erabaki” batean. 2014, 2015, 2016 eta 2017 ekitaldietan erresistentzia kutxatik egindako ordainketetan PFEZrentzako erretentziorik egin ote duten jakin nahi du, eta horretarako tresna horren laguntza jaso duten langileen identitatea eskatu die sindikatuei.

Ogasunak gutunean dioenez, langileek “zuzenean edo zeharka” jasotako ordainsari oro lan errendimendu bat da eta erretentzioa izan beharko luke. Inspektorearen ustez erresistentzia kutxak langileari “bermatzen” dio errenta osagarri bat, “lan harremana etenda” egotearen ondorioz jasotzeari utzi dion soldatarentzat.

ELA izan da azken urteetan erresistentzia kutxaren bidez zenbait sektoretan greba luzeak sustatu dituen sindikatua, eta langile borrokarako tresna horren garrantzia aldarrikatu duena. Afiliatuen kuotari esker hornitzen den kaxan 2012 eta 2016 artean 19,1 milioi euro izan zituzten eskuragai, elkartasun mekanismoak martxan jartzeko eta grebalariak laguntzeko.

Hain zuzen, azkenaldian izandako greba sonatuenetako batek, Bizkaiko zahar egoitzetako emakume langileek egindakoak, ELA sindikatua eta Bizkaiko Aldundia aurrez aurre jarri zituen hilabete luzez. 370 eguneko gatazkan inplikatutako emakumeek erakutsitako batasun eta indarraz gain, funtsezkoa izan zen beste langileen elkartasuna erresistentzia kutxaren bidez.

[Eguneraketa]:

Bizkaiko Ogasunaren eskaera publiko egin eta egun berean ELAk oharra kaleratu du esanez 38 urte daramatzala erresistentzia kutxa erabiltzen eta "euskal ogasunek ezarritako irizpideen arabera jokatu" izan duela.

Era berean, sindikatuak azaldu du jadanik bidali diola foru ogasunari eskatutako informazio guztia eta "horretan jarraituko" duela. ELAk Arabako Foru Ogasunean izandako prozedura baten berri ere eman du, baina alegazioak aurkeztu ondoren "espedientea amaitutzat" eman zela.

Azkenik, erresistentzia kutxa "ezinbesteko tresnatzat" duela dio eta ohartarazi du "eutsi" egingo diela langileek euren "lan baldintzen defentsan" hura erabiltzeko ezarritako irizpideei.

 

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal hauetan artxibatua: Langile borroka  |  Ogasuna

Langile borroka kanaletik interesatuko zaizu...
Azkenak
EGILEA
Argia buletina
Egunaren laburpena
zure e-postan
Eguneraketa berriak daude