Gipuzkoako sei erresidentziatako langileek abenduaren 19ra arte luzatuko dute greba, ostiralean Donostian egindako prentsaurrekoan azaldu dutenez. Iragarpena aste honetako hirugarren greba egunean egin dute, eta ELA sindikatuak patronalen “negoziatzeko borondate eza” salatu du. 

Sindikatuak Gipuzkoako aurrekontuak kritikatu ditu, zainketa sistemaren hobekuntzarako iragarritako %12ko igoeraren %83 “azpiegituretara” bideratzeko asmoa dutelako, eta ez lan baldintzak hobetzera. ELAren arabera, sektoreko langileen ia erdiak kontratu partzialak ditu eta soldata arrakala 10.000 eurotik gorakoa da. 

Langileek mobilizazioekin jarraituko dutela iragarri dute, sektoreko prekarietatearekin eta genero arrakalarekin amaitzeko.