Zierbenako Haizea Bilbao enpresan hiru langileri diziplina zigorra jarri diete, ELAk salatu duenez, lantegian egindako hainbat lanuzte eta mobilizaziotan parte hartu zutelako.

Enpresan 800 langile inguru aritzen dira eta aerosorgailuentzako egitura metalikoak egiten dituzte. Sindikatuak azaldutakoaren arabera, enpresak prebentzio neurririk ez dituela hartzen eta lan istripu larriak izan direla salatzeko atera dira langileak protestara.

"Diziplina-neurri horien helburua da beldurra sortzea, protesta desaktibatzea eta lan baldintza seguruak eskatzen dituztenen mobilizazio legitimoa zigortzea", salatu du ELAk, eta ohartarazi du ezin dela "zalantzan" jarri langileen osasuna eta "osotasun fisikoa" babesteko lanuzteak eta mobilizazioak egiteko eskubidea.

Hori dela-eta, azaroaren 26an greba deitu dute: "Egun horretan, langileek berriro erakutsiko dute osasuna eta segurtasuna ez direla negoziatzen, eta errepresaliak ezin direla onartu".