Nafarroako eskola publikoen hamarretik zortzik eskolaldi jarraia izanen dute

  • Nafarroako eskola publikoetara doazen familia gehienek eskolaldi jarraia nahi dute, eta gehiengoak horrela egingo du, baina behera egingo du kopuru osoak; sei eskolaldi zatitua izatera pasako dira eta bat malgura.


2024ko otsailaren 29an - 14:38
Azken eguneraketa: 2024-03-01 12:53:23

Hamar egun eman dituzte Nafarroako eskola publikoetako familiek eskolako ordutegia bozkatzen. Azkenean, 135 eskolek eskolaldi jarraia izanen dute, 31k zatitua eta bik malgua. Iaz baino zazpi eskola gutxiagok izanen dute eskolaldi jarraia Nafarroan. 2024-2025 ikasturtean hasiko dira, eta 2028. urtera arte mantenduko dute ordutegia.

Eskolaldi jarraia 14:00etan amaitzen da. Haurrak, beraz, orduantxe bertan, bazkaldu ostean –15:00etan– edo eskolaz kanpo doako jarduerak amaitzean –16:30ean– jasotzeko aukera dute gurasoek.

"Eskolaldi zatitua inposatu nahi ziguten"

Eskolaldi jarraiaren aldeko familiek osatutako plataforma kontent da emaitzarekin: “Familia guztien erritmoak errespetatzen dituzten eta berdintasuna sustatzen duten ereduaren alde egin dugu ia gehienok”. Gehitu dute familiek “kolpe bat” eman dutela mahai gainean: “Eskolaldi zatitua inposatu nahi ziguten, baina aurre egin diogu inori onurarik egiten ez dion ereduari”.

Plataformako kideek nabarmendu dute eskolaldi jarraiak ordutegi “malguagoa” eskaintzen duela: “Norbaitek ezin baditu haurrak eguerdian jaso, beranduago joateko aukera dauka”.

Zatituaren aldekoak ere, pozik

Bestalde, eskolaldi zatituaren aldeko familiek osatutako plataforma ere pozik agertu da, eskolaldi jarraia duten sei eskola publiko gutxiago egonen direlako aurrekoarekin alderatuta: “Eskolaldi jarraiaren zabalpena geldiarazten ari gara”. Gaineratu dute Lehen Hezkuntzako eta Haur Hezkuntzako beharretara “hobeto” egokitzen den “kalitatezko” hezkuntza behar dutela.

Zatituaren aldekoek ere diote 14:00etatik aurrera eskolaz kanpoko jarduerak eskaini beharko lituzketela zentroek, baina ez dutela egiten: “Haurrak gordetzeko toki bihurtzen da eskola”. Horrekin batera, uste dute "egoera zaurgarriagoan” dauden familientzat “okerragoa” dela: “Batzuentzat sozializaziorako espazio seguru bakarrak eskolak dira, eta jardunaldi luzeak denbora kentzen die”.


Kanal honetatik interesatuko zaizu: Hezkuntza
Palestinaren aldeko unibertsitate-sarea

EHUk Tel Aviv-eko unibertsitatearekin etorkizuneko lankidetzarako bideak ahalbidetzen dituen zibersegurtasuneko katedra bat sortu izanaren harira, bertako langileok interpelatuak izan gara hainbat lekutatik, eta esan beharra dut neurri handi batean lotsatuta sentitu naizela,... [+]


2024-04-18 | Euskal Irratiak
Tulalaika besta, Xiberoako ikastolei bultzada emateko

Hirugarren urtez Xiberoako ikastolei bultzada emanen die Tulalaika bestak.


Errendimendu akademikoaren arabera banatuko dituzte ikasleak Ipar Euskal Herrian

Ongi doazen ikasleak talde batean, zailtasunak dituztenak, bestean; maila akademikoaren arabera banatuko dituzte ikasleak datozen ikasturtean, Frantziako Estatuan. Ikasleak sozialki eta akademikoki sailkatu eta bereiztea, desoreka areagotzea eta egoera okerragoan daudenak... [+]


"Eskolan ortu xume bat lantzeak testuingurua ematen digu planetan ditugun arazoez aritzeko"

Gasteizko Haur eta Lehen Hezkuntzako ikastetxeetako baratzeak ikertu ditu Iratz Pou EHUko ikasleak. Zenbat eskolek dute ortua? Nolako erabilera ematen diote, zein helburu eta asmorekin? Probetxu pedagogiko eta didaktikoa ateratzen al diote baratzeari? Pourekin eta Igone Palacios... [+]


Eguneraketa berriak daude