240.000 milioi dolar (180.000 milioi euro) irabazi zituzten aberatsenek iaz. Gainera, Gobernuz Kanpoko Erakundeen nazioarteko federazioak argitaratutako txostenaren arabera (pdf), munduko populazioaren %1 aberatsenak %60 handitu ditu bere irabaziak azken 20 urteetan eta krisia galga izan ordez, irabaziak handitzeko bidea bihurtzen ari da.

Oxfamek adibide gisa jarri du luxuzko produktuen merkatua, zeina “bi digituko hazkundea” izaten ari den krisia hasi zenez geroztik urtero.

Etikarik eta eraginkortasunik gabe

Gehiegizko aberastasun hori etikoki arbuiatzeaz gain, Oxfamen txostenak dio eskema ez dela ekonomikoki eraginkorra eta maila politikoan, sozialetan eta ingurumenean egiten dituen kalteak azpimarratu ditu.