Italiako mediku talde batek artikulu bat idatzi du The Lancet aldizkari ospetsuan, herrialdea bizitzen ari den egoerari buruz. Helburua da beste herrialde batzuetan Italiak egindako akatsak saihestea, Naiz-ek argitaratutakoaren arabera.

"Kasuen gorakada azkar bat mehatxu larria da Italiako osasun sistema nazionalerako, zainketa intentsiboetako departamentuen gaitasun mugatua dela eta", azaldu dute Andrea Saglietto, Fabrizio d 'Ascenzo, Giuseppe Biondi Zoccai eta Gaetano Maria De Ferrarik.

Mediku hauek diotenez, Italiako Gobernuak pixkanakako arintze-neurriak ezarri zituen martxoaren 9an, bi egun geroago birusaren zabalkundea saihesteko elkarreragin sozialak nabarmen mugatzeko.

Testu honetan medikuek Andrea eta Giuseppe Remuzzi lankideak aipatzen dituzte. Bi mediku hauek gaixotasunaren proiekzio bat egin zuten: 30.000 kasu baino gehiago iragarri zituzten martxoaren 15erako. Datu errealak, berriz, 24.747 izan ziren, eta horrek iradokitzen du martxoaren 11n hasitako neurri murriztaileak beren fruituak ematen hasi zirela, kutsatuen kopurua 3-4 egun eskasean murriztuz.

"Badirudi Europako gainerako herrialde guztiek antzeko egoera dutela bi asteko epean", adierazi dute, eta horregatik, herrialde guztiei eskatu diete "Italiako ikasgaia" ikas dezatela eta "berehala neurri oso murriztaileak har ditzatela birusen hedapena mugatzeko, osasun-sistemak behar bezala erantzuten duela ziurtatzeko eta hilkortasuna murrizteko". Heriotza tasa hau hasiera batean % 4koa izango zela aurreikusi zuten, baina itxura guztien arabera, handiagoa da.