Huerta de Peraltako grebalarien aldeko "Elkartasun Egunak" 35 gizarte eragileren babesa jaso du

  • Urtarrilaren 11n, ostiralarekin, Elkartasun Eguna izango da Iruñean Huerta de Peraltan greban dauden langileen borroka babesteko. Iruñerriko 35 eragilek sostengua eman dio ekimenari eta egun horretako ekitaldietan parte hartzeko deia egin dute.

ARGIA @argia
2019ko urtarrilaren 10a
35 gizarte eragilek eman die sostengua Huerta de Peraltako langileei (arg.: LAB)

Manifestua sinatu duten eragileen artean daude LAB, ESK, EHNE, Steilas, Hiru eta CGT sindikatuak, hala nola Iruñerriko eta Nafarroako hainbat gazte mugimendu, pentsiodunen eta langabetuen plataformak, Bilgune Feminista edota SOS arrazakeria eta antzeko elkarteak. Azkoiengo enpresako langileen aldarrikapenekin bat egin dute sinatzaileek, eta azaldu dutenez gatazka hori “Nafarroan bizirauten duen arazo larri baten adierazle” da.

Eragile horien ustez landa eremuan aldizka zien urte osoan aritzen diren langileak “esplotatzen” dituzte: “Ez da beharrezkoa Almeriaraino joatea, gutxi batzuen  etekinak potoltzearren, zaurgarritasun egoeran diren pertsona migranteekiko abusu patronalak ikusteko”, diote.

Nafarroako instituzio publikoei eskatu diete gatazkan esku hartzeko, langile eta enpresaren artean “benetako negoziazio bat” eman dadin, eta nekazari zein herritarrei dei egin diete urtarrilaren 11n Iruñeko Sarasate Pasealekuan egingo den Elkartasun Egunera joateko. Besteak beste, Nafarroako Parlamentu aurrean burrunba egingo dute, hitzaldiak eta mikro irekia ere izango dira eta bazkari euskal-arabiarra antolatu du LAB sindikatuak.

Huerta de Peraltako langileak abenduaren 26tik daude greban; enpresako zuzendaritzak kaleratutako langileak berronartzea, lurralde hitzarmenaren arabera langileei zor dieten dirua kitatzea eta enpresa itun baterako negoziazioa hastea aldarrikatzen dute.

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal hauetan artxibatua: Langile borroka  |  Lehen sektorea  |  LAB  |  Azkoien

Langile borroka kanaletik interesatuko zaizu...
Azkenak
EGILEA
Eguneraketa berriak daude