Hego Euskal Herrian gutxieneko soldata propioa ezartzearen alde, martxa igo eta greba orokorrerako deia egin du Hego Euskal Herriko gehiengo sindikalak, martxoaren 17rako. Proposamena da 1.500 euro gordineko gutxieneko soldata ezartzea Hego Euskal Herrian, hau da, Espainiako Estatuan dagoen 1.184 euroko gutxieneko soldata 1.500 eurora igotzea, eta diferentzia hori Nafarroako eta Araba, Bizkaia eta Gipuzkoako gobernuek jartzea. Horrexegatik, LGS (Lanbide arteko Gutxieneko Soldata) hemen erabaki izango da erabiliko duten leloa.

Horixe bera lortzen ahalegindu dira orain arte ELA, LAB, ESK, STEILAS, Hiru eta Etxalde, mobilizazio dinamika bateratuan. Batetik, enpresariekin eta patronalarekin lanbide arteko akordioa lortzen ahalegindu dira, baina huts egin dute negoziaketek, Confebask patronalak uko egin baitio mahaian esertzeari, edo borondatea azaltzeari, eta gauza bera CEN patronalak. Bestetik, Gasteizko eta Iruñeko legebiltzarretan ekimen legegileak aurkeztu dituzte, parlamentuek gobernuei eska ziezaieten Espainiako lan harremanetan araudiak aldatzea, Eusko Jaurlaritzak eta Nafarroako Gobernuak eskumenak lor zitzaten aipaturiko soldataren diferentzia edo osagarri hori pagatu ahal izateko. Eskumen eza argudiatu dute, hain zuzen ere, EAJ, PSE-EE eta PSN ekimenaren aurka azaltzeko.