Muskizeko lantegian sindikatuek 83 eguneko greba bertan behera utzi dute, langileen baldintzetan aldaketa handirik gabe. Langile batzordeko ordezkaritzako hiruk –CCOO, UGT eta ELA– erabaki dute berriz heltzea lan hitzarmena eguneratzeko negoziazioari, enpresak grebalarien aurkako auzibiderik ez hastea onartzearen truke. Hala ere, greba deialdia langileen asanbladaren “onespenik gabe” bertan behera utzi dutela salatu du Trabajadores Unidos sindikatuak. Petronorrek, aldiz, auzibiderik ez hasteko baldintza gisa exijitu du sindikatu guztiek aho batez onar dezatela grebaren amaiera. Ondorioz, Trabajadores Unidos-ek “behartuta” sinatu du, onartu ezean “zaurgarritasun” egoeran geldituko direla argudiatuta.

Denbora daramate sokatiran langileak eta enpresak. Langileek salatu dute enpresak ordu erdi luzatu nahi duela eguneko lanaldia. Auzitegira jo zuten beharginek, haien ustez enpresak batzordearen onespena behar zuelako hori onartzeko. Oraindik ez dago epairik. Bitartean, langileen %91k hasi zuen greba, eta %80k enpresaren lehen eskaintza ezeztatu zuen. Orain, lan baldintzetan hobekuntza nabarmenik izan gabe amaitu dute greba, eta CCOOk, UGTk eta ELAk lan hitzarmenaren negoziazioan hobekuntzak lortzea espero dute. ELAk ez du baztertu grebara itzultzeko aukera, negoziazioetan hobekuntzarik lortzen ez badute.