(H)ilbeltza bekara proiektuak aurkezteko epea zabalik da

  • Baztanen gauzatzen den (H)ilbeltza euskal nobela beltzaren asteak IX. edizioa du aurtengoa, eta urtarrilaren 23tik 29ra gauzatuko da. Ekimenarekin batera, (H)ilbeltza beka ere abiatu dute, genero beltzeko narratiba proiektu bat diruz laguntzeko asmoz. Martxoaren 10a arte aurkeztu ahalko dira proiektu proposamenak.


2023ko urtarrilaren 09an - 10:19
Azken eguneraketa: 11:21

Urtero legez, aurten ere euskal literatura beltzari tokia egingo diote Baztanen, (H)ilbeltza ekimenaren bitartez. Urtarrilaren 23tik 29ra, nobela beltza ardatz hartuta, liburu-aurkezpenak, solasaldiak, mahainguruak eta zinema emanaldiak egingo dituzte bailaran. Arizkunen, Anizen, Elizondon, Iruritan eta Erratzun egin dituzte hitzorduak.

Ekimenaren IX. edizioaren baitan, (H)ilbeltza beka deialdia ere egin dute. Baztango Udalaren, (H)ilbeltza elkartearen eta Txalaparta argitaletxearen laguntzarekin, diruz-lagunduko da genero beltzeko narratiba proiektu bat. Dagoeneko ireki dute proiektuak aurkezteko epea, eta martxoaren 10era arte egongo da zabalik. Proiektuek, diru-laguntzara hautagai izateko, zenbait baldintza bete beharko dituzte: jatorrizkoak eta euskaraz sortuak izan beharko dira, beren zatiren bat edota osotasuna inon argitaratu gabea dutenak, inondik moldatuak ez direnak eta saririk jaso gabeak. Oinarriak osotasunean Txalapartaren web-orrian kontsulta daitezke.

Lan hautatua 6.000 euroko bekarekin lagunduko da, eta urtebeteko epea eskainiko zaio lana bukatzeko. Bekaren onuradunak maiatzean jasoko du bekaren erdia, eta lana aurkeztean beste erdia. Txalaparta argitaletxea arduratuko da lan hori argitaratzeaz.

Zazpigarren urtez abiatu da (H)ilbeltza beka, eta lagundu du ekimenaren helburuak betetzen: euskal literatura beltza sustatzea eta munduko literatura beltza euskaratzea. Bekari esker euskaratu dira Patricia Highsmith-en Lardaska edota Massimo Carlotto-ren Agur, maitea, ikusi arte lanak. Eta euskaraz sortu dira beste zenbait lan, hala nola: Miren Gorrotxategi Azkuneren Sotoan gordeak, Miel Anjel Elustondo Etxeberriaren Kezko bola batek itoak birikak eta iazko bekaren irabazle Eneko Barberena Mondragonen Suak erreko ez balu.

Azken lan irabazleak eta beronen egile Barberenak irekiko dute aurtengo (H)ilbeltza, urtarrilaren 23an 19:30ean Arizkungo Medikuaren etxean egingo den solasaldiarekin.


Kanal honetatik interesatuko zaizu: Euskal literatura
Otsoa dator!

Gizakiak istorio kontatzaileak gara, hainbeste, ezen esan ere egin daitekeen narrazio gaitasuna dela gizaki egiten gaituen ezaugarrietako bat. Kontakizunak behar beharrezkoak zaizkigu geure burua eta errealitatea eraikitzeko, eta bereziki aipatzekoa da ipuin klasikoek horretan... [+]


Uxue Alberdi. Hamarkada bi idazten (I)
Aulkitik aulkira, euli-giro eta Jenisjoplin, kontrako eztarritik dendaostera

Uxue Alberdiren lanari begira jarriko gara oraingoan. Lehenengo artikulu honetan helduentzako idatzi dituen ipuinak, eleberriak, saiakera eta kronika hartuko ditugu kontuan. Bigarren artikulu batean ilustratutako anekdotez, istorioez, filosofia liburuez eta idatzizko bertsoez... [+]


2024-02-12 | Jakoba Errekondo
Indi gaztainondoaren gerrateak

Zuloan sartuta egotea ez duk txarrena –esan zion Manuk–, txarrena duk ez jakitea noiz aterako haizen, edo inoiz aterako haizen ere. Lander Garroren Gerra Txikia nobelan, non gerra bateko iheslarien gorabeherak azaltzen dituen, pertsonaien artean, Anna Frank dakarte... [+]


2024-02-06 | Estitxu Eizagirre
Gorka Setien idazlea hil da

Gorka Setien Berakoetxea poemagile hernaniarra hil da otsailaren 4tik 5erako gauean. Bost liburu idatzi zituen, irrati libreetako ahotsa izan zen eta gozo entzuten eta zaintzen zekien. 2019an autoedizioan argitaratu zuen bere poema liburu berriena, Naufragoen altzoa.


Eguneraketa berriak daude