Urtarrilean eta otsailean egindako "lau greba eta mobilizazio egun arrakastatsuei" beste bost batuko dizkiete sindikatuek, sukaldeko eta garbiketako langileen zein irakasleen hitzarmenak eguneratzea eskatzeko. Sukalde eta garbiketako hitzarmena 2009koa da, eta irakasleena 2010ekoa.

Hitzarmen berriak lortzeaz haratago, langileek borroka bateratzeko arrazoiak dituztela adierazi dute sindikatuek. "Lan-karga gero eta handiagoak arintzeko neurri zehatzak adostea, erretiro-baldintzak hobetzea, plantillak gaztetzeko plana garatzea, galdutako erosteko ahalmena berreskuratzea, enplegu publikoa bermatzea eta lanpostuak egonkortzea zentro publikoen bat-egiteen eta itxieren aurrean, horiek alde bakarretik erabakitzen ari baitira jaiotza-tasaren jaitsierak aprobetxatuz". 

Hezkuntza ereduari dagokionez, besteak beste, eskatu dute "hezkuntza-sistema publiko osoa euskaldunduko duten hezkuntza-politikak abian jartzea", edo "hezkidetza plan egonkorrak eta kalitatezkoak garatzea".

Hezkuntza Sailari kritika

Hezkuntza Sailak izaten ari duen jarrera salatu dute sindikatuek: "Komunikabideen aurrean negoziatzeko prest dagoela esaten badu ere sailak, negoziazio-mahaietan jarrera itxia du, negoziazioa etengabe luzatzen du eta gatazkari zilegitasuna kentzen saiatzen da". Mobilizazioen helburua "aldarrikapen horiek lortzeko benetako negoziazioa bultzatzea" da, horien bitartez lortuko baita "sare publikoa erdigunean jartzea" eta "lan-baldintzak hobetzea"; beren esanetan.