Bilbon egingo duten jardunaldiak saharar herriaren inguruan egia argitzen eta justiziaren bilaketan sakontzea helburu duela zabaldu du Hegoa Institutuak (EHU). Horretarako erakunde sozialak, komunitate akademikoa, instituzioak eta alderdi politikoak bildu nahi ditu.

Ekitaldia 9:30etik 17:00etara Bilboko Itsasmuseum-en burutuko da. Bertan, erakunde sahararretako ordezkariak, legelariak, ikertzaileak, kazetariak eta hainbat alderdi politikok parte hartuko dute. Horiez gain, frankismoaren biktimen beste kolektibo hauek ere parte hartuko dute: Martxoak 3 elkartea eta frankismoko krimenen aurkako Argentinako kereilan inplikatutako pertsonak.

Egitaraua zenbait mahai inguruz, Sahararrak: frankismoaren eta postfrankismoaren beste biktimak. Memoria, memoriarik eza eta Espainiako Estatuaren erantzukizunak liburu aurkezpenak eta dokumental batek osatzen dute. Izen emateko galdetegia bete beharko da.

Liburuak frankismoaren eta postfrankismoaren garaietan sahararren aurka egindako krimenak ditu oinarri. Horretaz gain, sahararrak erregimen frankistaren biktima gisa aitortuak izatea eta Memoria Demokratikoaren Legearen babespean hartzea du helburu, Hegoa Institutuak dioenez.

Europar Batasuneko Platfomaren bitartez, Tokiko Elkartasunaren Europako Egunen hamargarren edizioaren baitan sustatutako jardunaldia da, ondorengoek antolatuta: Hegoa Institutuak, Euskal Fondoak, Euskadiko Saharar Ordezkaritzak eta Bilboko Udalaren.