100 sorosle baino gehiago ari dira hondartza gipuzkoarretan lan egiten udaran eta udalek azpikontratatzen duten zerbitzu bat da. Sorosle guztiak aldi batekoak dira, askok urteak daramatzaten arren lan hori egiten. Hilean 1.000 euro baino gutxiago kobratzen dute eta Gurutze Gorriko Gipuzkoako hitzarmena aplikatzen zaie.

“Beste behin, azpikontratazioan prekarietate gordinenarekin aurkitzen gara –dio ELAk–. Gurutze Gorriari, eta baita udalei ere, exijitzen diegu egoera honen aurrean soluzioak eman ditzatela, ezin ditugulako gure hondartzetan, munduko hondartza onenenetakotzat jotzen diren horietan, lan baldintza hauetan ari diren sorosleak izan”.

Soldata igotzea, finko-etena figura aitortzea eta kontziliazioa jorratzea eskatzen dute, besteak beste. “Uste dugu eskatzen ditugunak minimoak direla gure lan baldintzak hobetzeko”.

“Bandera urdina, egoera beltza. Sorosleak borrokan” lelopean, uztailaren 13an egin zuten prentsaurrekoaren ostean datoz mobilizazio iragarpenak.