Emakumeak borrokan
Pablo Casado Mexikoren konkistaz

"Ez dugu barkamenik eskatuko eta Elkanoren mundu bira ospatuko dugu"

  • Federico Jiménez Losantos kazetari espainiar ultraeskuindarrak esRadio katean duen saioan elkarrizketa egin dio PPko buruzagiari. Mexikoko konkistarengatik barkamena ez dutela eskatuko harro adierazi du eta Hernan Cortesen eta Juan Sebastian Elkanoren espedizioen V. mendeurrenak ospatuko dituztela gehitu du agintari popularrak.

Axier Lopez @axierL
2019ko martxoaren 28a

PP, Ciudadanos edota Vox bozkatzen duten herritarren artean dagoela esanez hasi du saioa Jimenez Losantosek. Casadok horri gehitu dio VOXi eskua luzatu diotela probintzia txikietan PPrekin estrategia bateratua adosteko. Horren ostean, heldu diote egunotako polemikari: Mexikoko presidenteak Espainiako Erregeari Mexikoko konkistan egindakoengatik barkamena eskatzeko idatzi izanak. Andre´s Manuel Lopez Obradorri "nazkagarria" deitu dio eta adierazi du: "Barkamenik ez dugu eskatuko, are gehiago, Hernan Cortes Mexikora heldu zeneko V. mendeurrena ospatuko dugu". Hernan Cortes konkistatzailea eta Mexikoko konkista bere egin ostean, ildo berean kokatu ditu Juan Sebastian Elkano eta mundu bira: "Pasa den astean Getarian izan nintzen Elkanoren mundu bira aldarrikatzen. Izan ere, orain Elkano bakarrik abertzaleek erreibindikatzen dute, Elcanori ‘k’ jarriz. Pedro Sanchez efemeride hau ez balego bezala jokatzen ari da”.

PPko agintariak aurreko egunetan aditzera eman duenez, V. mendeurrenekin konpromiso sendoa dute: "Atlantikoaren bestaldean Espainiak egindako rola ezinbestekoa izan zen, eta beste herri batzuk aurkitzen lagundu duten nazio handi guztien antzera; bost mende eta gero horrek harrotasunez bete behar gaitu”.

 

 

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!


Kolonialismoa kanaletik interesatuko zaizu...
Azkenak
EGILEA
Eguneraketa berriak daude