Zazpi emakumeren gidaritzapean, Musikari elkarteak sektoreko prekarietateari aurre egiteko lan egingo du

  • Musikari-Euskal Herriko Musikariak elkarteak zuzendaritza batzorde berria aurkezteko prentsaurrekoa egin du ostegunean Donostiako Udal Liburutegiko sotoan. Zazpi musikarik hartu dute ardura hori, eta zazpiak dira emakumeak.


2020ko urriaren 30an - 10:01
Musikari elkarteko zuzendaritza berriko lau kide ostegunean Donostian (argazkia: Xabier Burgaña).

Eneritz Dueso, Idoia Hernández, Olatz Salvador, Miren Narbaiza, Lide Hernando, Izaro Andrés eta Garazi Esnaola: horiek dira Musikari elkarteko zuzendaritza batzorde berria osatuko duten musikariak. Lehen laurek atzoko prentsaurrekoan adierazi zutenez, horizontaltasunez jarduten ahaleginduko dira, euskal musikari guztiek, elkarteko kide zein ez, hitza izan dezaten.

Zazpiek osatzen duten taldea otsailean hasi zen saretzen, Gernikan ehundik gora emakume musikari bildu zituen topaketaz geroztik, eta Musikari elkartean aurkitu dute haien behar eta aldarrikapenei bide emateko tresna.

Azaldu zutenez, elkartearen helburu nagusia musikariak saretu eta jarrerak elkartuz sektorearen beharrak eta aldarrikapenak bideratzea izango da. Horregatik, euskal musikariei elkartearekin harremanetan jartzeko gonbita luzatu diete. Duesoren esanetan, egun bizi dugun krisiak aurretik prekarioa zen egoera agerian utzi du eta horrek “gure egoerari buruz hausnartzera eraman gintuen, musikari bezala eta musikan aritzen diren langile bezala aspalditik bagenituen arazoei buruz”.

Horren guztiaren inguruan zerbait egiteko garaia zela iritzita erabaki zuten Musikariren zuzendaritza hartzeko beren burua aurkeztea. Bestalde, guztiak emakumeak izaki, jakitun dira generoak nola eragiten dien taula gainean eta azpian: “Helburuen artean egongo da arrakala ezabatzeko tresnak ipintzea, horien artean babesa eta formakuntza eskaintzea”.

Aurrean duten lan handiaz kontziente, musikarien sektorean erregulazio eta hitzarmenen falta dagoela salatu du Narbaizak, bai eta musikariak kontratatzeko orduan dagoen argitasun falta ere: “Legea 1985koa da, eta zaharra izateaz gainera oso anbiguoa da eta interpretazio asko egin daitezke bere gainean”. Era berean, Hernándezek gaineratu zuen horrek denak musikari asko utzi dituela laguntzak jasotzetik kanpo krisialdi honetan. Biltzeko eta saretzeko deia egin zuten, hobekuntzak lortu ahal izateko ezinbestekotzat jota. Kultura eragile guztiei ere dei egin diete, antolatzaile, teknikari eta abarrei elkarlanerako eta elkarguneak bilatzeko prest daudela azalduz.

Ekonomian duen pisuaz, Salvadorrek adierazi zuen kulturak baduela termino horietan neurtu ezin den balio erantsi bat, eta hori babesteko ere elkartu direla: “Kultura oinarrizkoa da gizartearentzat”. Ildo horretan, Duesok gaitzetsi zuen kulturari buruz termino ekonomikoetan hitz egiten dela datu errealik izan gabe: “Kolektibo oso heterogeneoa gara, askotan era alegalean lan egitera behartuak, eta jende horrek guztiak sortzen duen ekarpen kulturalaz gain, ekonomikoa jakitea ia lan ezinezkoa litzateke”.

Dagoeneko lanean

Euskal erakundeei Artisten Estatutua landuko duen mahaia sortzeko eskaera egin zieten, orain inoiz baino beharrezkoagoa dela iritzita: “Hainbat bidetatik bidaltzen zaizkigu mezuak zin eginez hau eta bestea emango zaigula, baina benetako konpromisoa eskatu nahi genuke”, adierazi du Duesok. Hari beretik, erakundeek sektorearekiko ezagutza falta nabarmena dutela salatu dute, Eusko Jaurlaritzak maiatzean kultura arloko diru-laguntzak jasotzeko jarritako baldintzak adibide bezala jarriz. Musikari elkarteak baldintza horiei emendakina aurkeztu zizkien, baina ez zituzten kontuan hartu. Sektorearen izaera intermitentea kontuan hartzen ez delako kexu agertu dira. Dena dela, adierazi dute prest daudela “ahal den jende guztiarekin hitz egiteko”.

Gainera, urte honetan bertan Espainiako Estatuko beste 14 musikari-elkarterekin bultzatu duten Unión de Músicos Porfesionales federazioaren baitan Musika Sektorea Berreraikitzeko Plana landu dute. Hiru lan-ildo nagusi dauzka: musikarien lana eta jarduera ekonomikoa babestea, sustatzea eta bultzatzea; musikariei behar bezalako babes soziala eskaintzea eta egoera ekonomikoa hobetzea; eta musikak eta kulturak herritarren bizitzan duten funtsezko balioa azpimarratzea eta aitortzea. Plana datozen asteetan aurkezteko asmoa dute.


Irakurrienak
Matomo erabiliz
Azoka
Kanal honetatik interesatuko zaizu: Politika kulturalak
2024-02-28 | ARGIA
Urdaibaiko Guggenheim proiektuaren aurkako ekimenak ez dira eten

Urdaibaiko Guggenheimen proiektua bi urtez etengo dutela iragarri zuten urtarrilean Lakuak eta Bizkaiko Aldundiak, baina museoa eraiki ez dadin borrokan jarraitzen dute ekintzaileek. Futuro Vegetal aktibista klimatikoen azken ekintza eta Guernica Gernikara taldeak antolatu duen... [+]


Ogi-apurrak Afrika espoliatuarentzat

Ghana, 1823. Ashanti Inperioaren eta britainiarren arteko lehen gerra hasi zen. Guztira lau gerra izan ziren bien artean, eta gatazka 1901 arte luzatu zen. Lehenago, europarrek herrialdeko Urrezko Kosta kontrolatzen zuten. Baina 1807ko esklabotzaren abolizioaren ondorioz,... [+]


Donostiaren Kontenedora
Sorkuntzari trabak, kultur hirian

Donostiako Amara auzoan dagoen Kontenedora sorkuntza espazioak ez du estreinako urterik onena izan: bederatzi hilabetez itxita egon da, burokraziaren katramiletan harrapatuta. Udalak ezarritako trabak azaldu dituzte. Abokatu eta arkitekto artean aritu ostean, baina, badirudi... [+]


“Kable bilketa” gisa definitu du EH Bilduk Guggenheim Urdaibai proiektua bi urtez gelditzeko erabakia

Busturialdea eskualdeko hainbat alkate eta zinegotzi bildu ditu EH Bilduk Gernikan emandako prentsaurrekoan. Idurre Bideguren senatariak adierazi du neurria EAJren “kudeaketa eredu zaharkituaren beste adibide bat” dela.


Eguneraketa berriak daude