Urrutikoetxearen epaiketa berriz ere atzeratu da

  • Iragan martxoan Parisen egin behar zen epaiketa asteazken honetara atzeratu zen, eta orain berriz ere atzeratu da fiskaltzak hala eskatuta. Artean iheslari zela, ETAko buruzagia 2017an epaitu zuten talde armatuko kidea izateagatik eta zortzi urteko espetxe zigorra ezarri zioten, 2011-2013 arteko garaian ETAn izandako jardueragatik.


2020ko urriaren 22an - 11:18
Josu Urrutikoetxea, "Marianne"-k argitaratutako argazkian.

Frantziako Estatuko legedian epaiketan ez dagoen norbaitek zigorra jasotzen badu, epaiketa errepikatzeko aukera du. Josu Urrutikoetxea 2019ko maiatzean atxilotu zuten Frantziako Alpeetan eta aipatu epaiketa 2019ko irailean egitekoa zen. Atzeratu egin zen 2020ko martxora arte, baina orduan, prozedura akatsak tartean, berriz atzeratu zen. Asteazken honetan egitekoa zen hori Parisen eta orain 2021eko ekainaren 15-16ra arte atzeratu dute.

2010ean ere, ihesean zegoela epaitu eta zazpi urteko espetxe zigorra jarri zioten, kasu honetan 2002 eta 2005 artean ETAko buruzagiekin izandako harremanengatik. Epaiketa hori ere berregitea eskatu zuen Urrutikoetxeak, joan den urriaren 19an egiteko zen, baina atzeratu egin zen.

ETAko negoziatzaile

Atzerapen hauen arrazoien atzean bada COVID-19ko garaia, besteak beste, atzerriko lekukoak ahozko auzira etortzeko zailtasunak dituztelako, baina badira ere ETA-Espainiako Estatua negoziazio aferak. Suitzan eta Norvegian ETA eta Espainiako Gobernuaren arteko elkarrizketetan ETAko ordezkari gisa jardun zuen Urrutikoetxeak, eta lan hori egiteko bi estatuen baimen diplomatikoa zuen Frantzian edo atzerrian mugitzeko, Suitzan eta Norvegian esaterako.

Urrutikoetxearen defentsak erakutsi nahi du, denbora horretan guztian bakea gauzatzeko bide baten bila zebilela bere defendatua, eta bi estatuek zeregin horretarako babesa eskaini ziotela. Parisko Auzitegiaren fiskaltzak, aldiz, orain arteko instrukzioan Urrutikoetxearen lan diplomatikoari ematen zaion garrantzia ezabatu nahi du. Joan den igandean Marianne aldizkariak Urrutikoetxeari egindako elkarrizketan luze eta zabal hitz egiten da kontu hauez.

ETAko buruzagiak dioenez, 2002an Hegoaldetik ihes egin eta berriz ere klandestinitatean sartzen denetik, “gatazka hau hurrengo belaunaldien eskuetan ez usteltzen uztea da bere helburua” eta horretan engaiatzen dela hurrengo urteetan. Aitortzen du bere lan garrantzitsuenetakoa izan zela ETAn bertan bake prozesuarekiko erresistentzia ikuspegiak baretzea, eta horretarako dozenaka eta ehunka bilera egin behar izan zituela ETAko kideekin.

Suitzan eta Norvegian izan ziren negoziaketa hauek, eta elkarrizketan aipatzen da nola eraman zituzten hegazkin pribatu batean Genevatik Oslora, eta nola, 2011ra arte irauten duen prozesuan Urrutikoetxea negoziazio eta elkarrizketa saioetan ari den batetik bestera.

Iragan urriaren 20an bederatzi urte pasatu dira ETAk jarduera armatuaren amaiera iragarri zuenetik. Urrutikoetxearen ahotsa zen amaiera iragartzen zuenetakoa. Bera tartean zela, halaber, 2011n ETAko ordezkaritza bat joan zen Norvegiara erakundearen armagabetzeaz hitz egiteko, baina Espainiako Gobernuak ez zuen ordezkaririk bidali erakunde armatuaren amaiera bideratzeko. 2013ra arte egon ziren bertan zain etakideak eta Espainiako ordezkaritzarik ez zetorrenez, azkenean Norvegiako Gobernuak kanporatu egin zituen.

Orkatilako pultsera telematikoarekin, 2019ko uztailaren amaieratik baldintzapeko askatasunean da Urrutikoetxea, dagozkion epaiketak egiteko zain. Hauek egin ostean, Espainiak egindako hainbat estradizio eskaerari egin beharko dio aurre.


Kanal honetatik interesatuko zaizu: Euskal gatazka
Sortuko sei kide epaituko dituzte euskal presoei "ongi etorri" ekitaldiak antolatzeagatik

Espainiako Auzitegi Nazionaleko Manuel Carcía Castellón epaileak sei pertsona epaituko ditu Ongietorrien auzian: Antton López Ruiz Kubati, Kai Saez de Egilaz, Pipe San Epifanio, Haimar Altuna, Oihana Garmendia eta Oihana San Vicente. Guztiak Sortuko kideak... [+]


Urtebeteko eta bi urteko espetxe zigorrak eskatu ditu prokuradoreak Molle eta Etcheverry bakegileentzat

Espetxe zigor arinak eskatu ditu Frantziako fiskaltzak Parisen epaitzen ari diren Jean Noel Txetx Etcheverry eta Beatrice Mollerentzat, ETAren helburuen arabera jardutea egotzita. Hala, zigor horiekin bakegileek ez lukete espetxera joan beharko. Maiatzaren 16an emango dute... [+]


Epaiketa
Parisek armagabetze prozesuan "kooperatu" zuela argitu du Fekl Barne ministro ohiak

ETAren armagabetzea bideratzeko, bakegileekin lankidetzan aritu ziren Frantziako autoritateak. Hala adierazi du Matthias Fekl Barne ministro ohiak asteartean, Parisko Zigor Auzitegiko 16. ganberan, Beatrice Molle-Haran eta Jean-Noël Txetx Etcheverry-ren aurka egiten ari... [+]


Eguneraketa berriak daude