Nafarroako Ikurren Legea indargabetuko dutela jakinarazi zuen lauko gobernuak martxoaren 30ean. Ondorioz, “Nafarroako bandera defenda dezagun” izeneko plataforma herritarrak gobernuaren aurkako manifestazioa antolatu du. “Defendamos la bandera de Navarra, gurea defenda dezagun” lemapean aterako dira kalera ekainaren 3an. UPNk, PPNk eta Ciudadanosek deialdiarekin bat egin dute hasieratik eta asteburuan PSNk jakinarazi du parte hartuko duela.  

Gobernuaren aurkako manifestazioa denik ukatu dute sozialistek. “Bizikidetza, autogobernua eta aniztasunaren alde egiteko eta nafar guztiak ordezkatzen dituzten ikurrak babesteko” baliagarria izan daitekeela adierazi dute. Martxan parte hartzera deitu dituzte hiritarrak, “nafar moduan batzen gaituena babesteko”.

PSNren erabakiak harridura sortu du militante batzuen artean. Noticias de Navarra egunkariak jakinarazi du horietako batzuk egunkariarekin kontaktuan jarri direla, jakinarazteko ez daudela ados alderdiaren erabakiarekin.