ARGIA.eus

2021eko abuztuaren 03a

Nafarroan ostiraletik aurrera malgutuko dituzte neurriak

  • Ostalaritza guneen itxiera gauerdiko hamabiak arte atzeratuko da, eta kirol eta kultur ekitaldietan baimendutako edukiera handitu. Ipar Euskal Herrian eta EAEn ere malgutuko dituzte neurriak.

Iraitz Madariaga Etxebarria
2021eko ekainaren 17a
Nafarroako Gobernuko kideen eta ostalaritza sektoreko ordezkarien arteko bilera, 2020ko azaroa. Argazkia: navarra.eus

Nafarroako Gobernuak, ekainaren 18tik aurrera, neurri berriak ezarriko ditu ostalaritzan eta beste hainbat sektoretan. Ostalaritzaren ixteko ordua gaueko hamaiketatik gauerdiko hamabietara arte atzeratuko dute, eta edukiera %30etik %50era igo. Kultur jardueretan, berriz, aforoa %60koa izango da. Erabaki horiek uztailaren 1era arte egongo dira indarrean.

Irekiera ordu betez luzatzeaz gain, taberna eta jatetxeetan sei pertsona egon ahal izango dira mahai bakoitzean. Haien artean 70 zentrimetroko segurtasun tartea errespetatu beharko dute, eta beste mahaien artean, bi metroko distantzia. Hoteletan, berriz, gune komunen gehienezko edukiera %60koa izango da, eta ekitaldi bereziak —ospakizunak, jaunartzeak, batailoak ezkontzak...— antolatzen dituzten establezimenduetan 50 pertsona egon ahal izango dira barnealdean eta beste 100 kanpoaldean.

Kultur eta kirol jardueretan ere neurri berriak

Liburutegietan, museotan eta erakusketa geletan ere %60koa izango da aforoa, eta gehienez, 300 lagun bildu ahalko dira. Zinemetan, antzokietan eta auditorioetan, bestalde, aldez aurretik esleitutako eserlekuak izan beharko dituzte hurbiltzen direnek. Kultur ekitaldi horiek hamabiak arte antolatzen ahalko dira.

Kirol jardueretan publikoa baimenduko da, %50eko gehienezko edukierarekin. Barnealdean, 300 pertsona egon ahalko dira, eta kanpoaldean, 600. Piszinak gaueko hamarrak arte irekiko dira, eta %60ko edukiera izango dute, aldagela eta dutxetan izan ezik (%50 izango da muga). 

Beste sektore batzuetan ere aldatuko dira baimendutako edukierak. Akademietan eta arautu gabeko ikasketa zentroetan %60 izango da aforoa, eta peñetan eta elkarte gastronomikoetan, berriz, %40. Erabilera anitzeko espazioak %50ean okupatu ahalko dira, bingoak, joko-aretoak eta antzekoak bezala.

Ipar Euskal Herria eta EAE

Ipar Euskal Herrian, gaurtik aurrera ez da beharrezkoa izango kanpoaldean musukoa erabiltzea, jende pilaketak egoten diren leku gutxi batzuetan (azokak edo kirol ikuskizun zehatzak) ez ezik. Bestalde, Araba, Bizkaia eta Gipuzkoan, Urkullu lehendakariak ekainaren 18rako deitu du LABI, datorren astelehenetik aurrera neurriak malgutuko dituzten erabakitzeko: establezimenduak gaueko ordu bata arte irekitzea, ostalaritzako mahaietan 6 pertsona bildu ahal izatea, 'txokoak' zabaltzea eta kirol jardueretan publikoa baimentzea, besteak beste.

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal hauetan artxibatua: Koronabirusa  |  Nafarroa  |  Koronabirusa

Koronabirusa kanaletik interesatuko zaizu...

Azkenak EGILEA
Argia buletina
Egunaren laburpena
zure e-postan
Eguneraketa berriak daude