“Lasa eta Zabala” eta “Amama” filmei emandako diru laguntzen txostenak eskatu ditu Urquijok
Hogei eguneko epean Amama eta Lasa eta Zabala filmeei emandako diru laguntzen txostenak eskatu dizkio Espainiako Gobernuaren EAEko ordezkari Carlos Urquijok Gipuzkoako Foru Aldundiari. Aldundiak 100.000 euroko laguntza eman zien bi pelikula horiei hedapen eta ekoizpen gastuetarako.
Ordezkariaren “etengabeko jazarpena” salatu dute Foru Aldunditik, “euskararen inguruko gaietan” bereziki. Horren aurrean, “Gipuzkoa euskaldunago bat lortzeko beharrezko neurriak” hartzen jarraituko duela adierazi dute Gipuzkoatik.
Larunbatean hizkuntza politikak bakean utz ditzatela eskatzeko manifestazioa
Kontseiluak eta UEMAk otsailaren 28rako manifestazioa deitu dute Donostian. “Oztopoen gainetik euskaraz biziko gara!” lelopean, Espainiako eta Frantziako Estatuek Euskal Herriko hizkuntza politiketan esku hartzeari utz diezaioten eskatuko dute. Mobilizazioa Gipuzkoa plazatik abiatuko da 17:30ean.
