Maulen Ondarearen Etxe aurrean egin dute mobilizazioa, Donapaleun herriko etxearen aurrean, eta Baionan Euskal Museoaren aurrean. “Euskal Herrian, euskara hainbatetan ukatua da edo bigarren mailako hizkuntza bezala tratatua da, hots euskaldunak zapalduak gara”, adierazi du EHEk ohar batean.

Bigarren mailako izaera horren adibide gisa jarri du Baionako Euskal Museoa EHEk. “Museoak publikoari zuzendutako idazkietan euskara erabiltzen du, bai, baina kasik beti lehenik frantsesa erabiltzen du, eta frantsesez dagoena euskaraz dagoena baino handiagoz idatziz usu. Euskal Museoaren logoak ongi erakusten du hori: lehenik eta handiz Musée Basque, bigarrenik eta txikiz Euskal Museoa”.

Lapurdiko hiriburuan Gorka Torre EHEko kideak adierazpenak egin dizkio Euskal Irratiak-i. Euskara “larrialdi egoeran” dagoela gogoratu eta Euskal Herriko erakunde sozial, politiko eta kulturalei eskatu die euskara "lehentasunez” erabiltzea: “Alegia, lehenik euskaraz aritzea, eta batez ere euskaraz aritzea”.

Mobilizazioek aldarrikapena eta jai giroa uztartu dituzte. Besteak beste, jauziak dantzatu dituzte “hizkuntza politiketan eman beharreko jauziak” irudikatzeko.