Euskararen, katalanaren eta galizieraren ofizialtasuna indartzeko helburua duen lege proposamena aurkeztu dute asteazkenean Espainiako Kongresuan. 22 parlamentarik izenpetu dute testua eta zehazki, EH Bildu, EAJ, ERC, BNG, Compromis, Mes per Mallorca eta En Comu taldeetakoak dira bat egin dutenak. "Hizkuntza politika ausarta eta aterpe juridiko sendoa behar ditu euskarak oldarraldi judizialari aurre egiteko. Nazioaniztasuna ezin daiteke sinbolikoa izan. Bada garaia euskal hiztunon hizkuntza eskubideak errespetatzeko", adierazi du EH Bilduko bozeramaile Mertxe Aizpuruak.

Botere judizialarekin eta Espainiako Estatuko administrazio orokorrarekin dituzten harremanetan norberak bere hizkuntza propioan jardun ahal izateko bidea bermatzea du helburutzat lege proposamenak. Demagun, Espainiako Estatuko instituzioen jardunbide ohikoan gaztelania lehen lerroan jartzen dela kontuan hartuta, "desoreka" hori zuzendu nahi izan dute, argi utziz euskaraz, katalanez edota galizieraz aritzeak "erabateko baliozkotasun juridikoa" duela. Hortik tiraka, hainbat lege erreforma proposatzen ditu testuak. Besteak beste, horietako batean jaso dute justizia administrazioan jarduteko aintzat hartu beharko dela euskaraz, katalanez edo galizieraz jakitea, baita justizia prozeduretan ontzat jo beharko direla hizkuntza horietan idatzitako dokumentuak.

Hezkuntza arloa ere jorratzen dute lege proposamenean. Gaur egun, araudi autonomikoek diote derrigorrezko hezkuntza bukatzean ikasle guztiek gaztelania ez ezik autonomia erkidegoko hizkuntza ere jakin beharra dutela. Lege proposamenarekin, ordea, urrunago joan nahi dute, estatu mailako lege organiko batean bermatuta betebeharra.

Junts per Catalunya alderdiak ez du bat egin oraingoz lege proposamenarekin eta testua aurkeztu dutenek zehaztera eman dute PSOErekin ere hartu-emanetan direla.