Interneteko salmentetako enpresa erraldoiak, Amazonek, ateak zabalik mantentzen ditu, Espainiako Gobernuak horrela baimenduta. CCOO eta CGT sindikatuak kexu dira: Madrilgo biltegi batean zortzi langile kutsatu dira jada, eta 80 jarri dituzte berrogeialdian. Biltegi horretan bertan Espainiako Estatuko salmenten %15 eta %20 artean banatzen dira.

Jakitun dira horrek jendearentzat ekarri dezakeen arriskuaz, eta enpresari neurri zorrotzak eskatu dizkiote, lanaren diseinua, lanaldien antolaketa eta instalazio guztien desinfekzioa, besteak beste. Horrez gain, Espainiako Estatuan oinarrizko produktuen salmentara bideratuta dauden biltegiak daudela gehitu dute, Madril eta Bartzelona inguruan, eta horiek zabalik mantentzea eskatu dute, oinarrizko produktuen salmenta soilik ahalbidetuz.

Beste zenbait herrialdetan, Amazonen positiboak atzeman direnean erantzunak anitzak izan dira. Italiako biltegi batean bi lagunek positibo eman zuten, eta ondorioz, langileek greba egin eta herenak lanera ez joateko hautua egin zuen. AEBetan, aldiz, behin-behineko itxialdia ezarri du enpresak New Yorkeko Queens auzoko biltegi batean kasu positibo bat agertzearekin batera.