Koronabirusa Txinako laborategi batean sortzea litekeena dela esan dute AEBek
Pandemiaren hasieratik bertatik hizketagai nagusia izan da bere jatorria. Teoria zabalduenak Wuhango hiriko merkatuan jarri du bere jaioterria; baina AEBetako Gobernuak Wuhango Birologia Institutuan jarri du jo-puntua. Hango higiene baldintza txarrek pandemia sortu ahal izan zutela kaleratu du.
aurre egingo dieten hedabide independenteak
AEBetako Gobernuak Wuhango Birologia Institutua pandemiaren sorrera posiblea izatea aztertzeko eskatu dio Txinako Gobernuari. Birusa nahita sortuta egotea baztertu dute AEBek, baina laborategian gertatutako istripuren baten ondorioz birusa zabaldu izana posible dela adierazi dute. Australiako Gobernuak bat egin du AEBetakoaren eskakizunarekin eta azalpenak eskatu dizkio Txinari.
Teoria horren sorrera AEBetako diplomatikoek idatzitako zenbait txostenetan oinarritu dute. Txosten horietan diplomatikoek beren kezka azaltzen zuten, laborategiko segurtasuna egokia ez zelako. The Washington Post-ek kaleratu bezala, duela bi urte AEBetako delegazio bat laborategia aztertzera joan zen espreski, eta laborategiko segurtasun baldintzak eta egindako esperimentuak arriskutsuak zirela ondorioztatu zuten.
Polemika helburu?
Wuhango Birologia Institutua segurtasun altuko laborategia da, eta Vilaweb-ek kaleratutakoaren arabera, segurtasun neurri horietako laborategi batean oso zaila da birusak ihes egitea. Dena den, polemika horrek tentsioa sor dezake bi estatuetako gobernuen artean, eta zenbait adituk diote hori dela AEBen helburua: Gobernuak krisian izan duen kudeaketa “txarrak” sortu duen atentzio beste nonbaitera bideratzea.
