ВГТРК telebista nazionalean eman du neurrienberri Putinek. “Diziplina eta ardura” eskatu dizkie herritarrei. Ez du konfinamendurik iragarri, baina astebeteko jai nazionala dekretatu du, beharrezkoak diren lanak egiten dituztenek, janari-dendetako, farmazietako, garraio zerbitzuetako, banketxeetako eta administrazioko langileek jai izango ez badute ere. Ez du erreferendumerako data berririk adierazi.

Errusiak ez ditu gainontzeko Europako herrialdeetan erregistratutako datu altuak zenbatu: 658 lagun kutsatu ditu koronabirusak, martxoaren 25eko datuen arabera. Herrialdeak bere ohiko martxa jarraitzen du, metroak jendez beteta jarraitzen du, eta kaleko saltzaileek beren produktuak saldu nahian jarraitzen dute, Gonzalo Aragonesek La Vanguardian kontatu bezala.

Hala ere, Estatu burua hiriburuko alkate Serguéi Sobianinekin bildu da eta honek bere kezka azaldu dio. Hiriburuan ia 200 lagun kutsatu dira, eta hori geldiarazteko neurriak adostu dituzte bi agintariek. Hori horrela, martxoaren 27tik aurrera 65 urtetik gorakoek etxean geratu beharko dute, apirilaren 14ra arte.

Euskal Herriko hainbat herritan bezala, Moskun ere bolondresen taldeak izango dira konfinatutako horiei janaria eta sendagaiak eramango dizkietenak. Horrez gain, 4.000 rubloko laguntza emango die udalak, 50 euro inguru. Hala ere, enpresetako zuzendariak eta enpresetan ezinbesteko papera duten adinekoek ez dute etxean geratu beharko; Putin talde horretan sartzen da, 67 urte baititu.

Kritikak Gobernuari

Errusiar gizartea izatez "sinesgaitza eta mesfidatia" dela zioen Vladímir Gúbarev idazleak. Eta horrela izan da kasu honetan ere. Izan ere, Putinek kritikak jaso ditu konfinamendu totala ez ezartzeagatik. Berarekin kritikoak direnek sare-sozialetan adierazi dute astebeteko oporraldiak herri eta hirietako parkeak bete besterik egingo ez dituela.

Horrez gain, Anastasía Vasílieva Medikuen Aliantza sindikatuko presidenteak adierazi du Gobernuak benetako datuak ezkutatzen dituela. "Autoritateek egia ezkutatzen dute, inoiz ez dutelako onartuko ez dutela baliabide nahikorik. Ama berrien atalak neumonia duten pazienteentzako bideratu dituzte, gainezka egin behar du sistemak", dio Vasíliek. Gehitu du koronabirusa edo arnas aparatuko infekzio bezala diagnostikatzen dituztela koronabirusaz gaixo daudenak.

Neurriak hartzen lehenengotarikoa

Hala ere, Melita Vujnovic, OMS-ren Errusiako bozeremaleak azpimarratu du Errusia neurriak hartu zituen lehenengo herrialdeetakoa izan zela. Urtarrilaren 30ean Txinarekin 4.200 kilometroko muga itxi zuen, eta otsailaren 3rako herrialde horrekin zituen tren-komunikazioak moztu zituen, handik egun gutxira txinatarrei sarrera debekatuz. “Errusia urtarril amaieran hasi zen froga medikoak egiten”, gehitu du Vujnovicek.

Neurri berriak

Telebista kate nazionalean egindako agerraldian neurri berriak ere iragarri ditu. Askok azpimarratutako tonu “populistarekin” adierazi du, umeen mantenurako diru-laguntzak igo, aseguruetako prezioak jaitsi eta kanpoko inbertsioei eta errusiar aberatsei zergak igoko dizkiela.