Europako ikerketan galderak erantzunez parte hartu duten 10.306 kirolariei, jasandako indarkeria kopuruez eta motez galdetu ostean, eskatu diete hautatzeko jasan duten indarkeria gertakari larriena, gehien markatu dituena, eta berau sakon azaltzeko. Hortik atera dituzte datu hauek, EHUk antolatutako hitzaldian Montse Martík azaldu zuenez:

Erasotzaileen perfila gizonezkoa eta eremua kluba

Erasoen %50ean erasotzailea gizon bat izan da, eta berak bakarrik burutu du erasoa. Erasoen %30etan gizonak eta emakumeak elkarrekin izan dira erasotzaileak eta erasoen %20an emakumezko bat izan da erasotzailea, eta berak bakarrik burutu du erasoa.

Eta eremuei begira, nabarmen, kluba da indarkeria mota guztiak gehien pairatzen diren eremua. Martík horregatik esan du “prebentzio lanik handiena kirol klubetan egin behar” dela.

Gizartean dagoen iruditegia hautsiz, Europako ikerketa honen datuen arabera, mutilek indarkeria gehiago jasaten dute kirolean neskek baino, baita sexu indarkeria ere. Artikulu honetan aztertu ditugu datu horiek xehe.

Montse Martí: "Erasotzaileak denboraz prestatzen ditu biktima, haren familia eta kluba"

Martík azaldu du erasotzaileak bere biktima prestatu egiten duela: “Indarkeria sexuala ez da aldagelara sartu, bortxatu eta alde egitea. Prozesu oso luzea du eta horrela ziurtatzen dute biktimak ez duela hitz egingo. Gure ikerketako kasu hauek denek oso heldutan kontatu zuten umetan gertatu zitzaiena, eta inork ezin izan zuen epaitegira jo, kasua dagoeneko preskribatuta baitzegoen”. Erasotzaileak biktimaren autoestiman eragiten duen lanketa psikologikoa egiten duela azaldu du: batzuetan losintxen bidez "bakar eta berezi" sentiaraziz, bestetan hutsaren pare sentiaraziz, edo besteengandik aislatuz, ez dezaten ihesbiderik izan.

Familia ere preparatu egiten du erasotzaileak, biktimak adin txikikoak direnez, horrela lortzen baitute familiak konfiantza jar dezan erasotzailearengan. Kirolariek azaldu dute askotan sexu erasoak gurasoen etxean bertan jasan dituztela kirol munduko pertsona horrengandik. Familak ez ote zuen susmorik galdetuta, “ez, ez, asko maite zuten gainera, entrenatzaile handia zen haientzat” erantzun dute askok.

Kirol ingurunea ere preparatu egiten du erasotzaileak. Adin txikikoren batek salatzen badu, klubak ez duela sinesten azaldu du Martík eta entrenatzailea sinestu ohi dutela, eta emaitza onak ekarri baditu eta karisma badu, are gehiago. “Nola da posible klubek ez ezer jakitea, egiten diren gauzak eginda?" galdera airera bota du, klubek jakiten ote duten edo bestaldera begiratzen duten iradokiz. Baina bestalde, "erasotzaileak erraminta asko ditu egiten dituen gauzei beste zerbaiten itxura emateko”, gehitu du.

Biktimek Martíri aipatu dioten ezaugarrietako bat da erasotzaileak lehia giro muturrekoa sortzen duela taldean, kirolarien artean jeloskortasuna sustatzen duela, oso giro toxikoa, eraso egiten duenerako biktima taldekideengandik erabat aislatuta egon dadin eta oharkabean pasa dadin egiten duena. “Hautatua sentitzearen gaia ere askotan errepikatzen da biktimen artean” dio Martík.