Taldeak eta familiak jarritako salaketaren ondoren abiatu du ikerketa Ertzaintzak. Onda Vascak ezagutarazi duenez, gertakizunak otsailaren 20an izan ziren. Haurra entrenatzera joateko aldatzen ari zela ustez gizonak argazkiak atera zizkion. Umea estaltzen saiatu zen eta beldurtuta amaren bila atera zen, gertatutakoa kontatzeko. Taldeak gizona kanporatu du eta instalazioetarako sarrera ukatu dio.

Gertakarien aurrean "gaitzespenik sendoena" adierazi du Ortuellako udalbatzak; eta "pertsonen eskubideen edozein urraketaren aurrean tolerantziarik gabeko jarrera mantentzen dutela eta beti mantenduko dutela", gehitu dute.

Taldeak familiei bidalitako komunikatuan "atzo izan zuen klubak gure eskola-umeko jokalari batek jasan zuen egoeraren berri. Gertatutakoa jakin bezain laster, klubak protokoloa aktibatu zuen eta pertsona instalazioetatik baztertu zuten" jasotzen da Onda Vascak publiko egin duenez. Taldeak adierazi du, halaber, "protokoloari jarraipena emateko Ertzaintzaren informazioaren esperoan" daudela eta "dagokion momentuan familiei informazio gehigarria helaraziko diela".