Enrique Maya Iruñeko alkateak desleialtasuna egotzi die, udal Gobernu Batzordetik kanporatu ditu eta zinegotzi kargua utz dezaten eskatu die. Fermín Alonso Proiektu Estrategikoak, Mugikortasuna eta Iraunkortasun zinegotzia izan da, eta García-Barberenak Kultura eta Berdintasuna eraman ditu. García-Barberenak aski protagonismo izan du azken urte honetan, besteak beste berak gidatu duelako Iruñeko Sanferminetako Gazteluko Plazako barren proiektu polemikoa.

Bi zinegotziek adierazi dutenez, PPk UPNk baino hobeto ordezkatzen ditu Nafarroako zentro-eskuinaren baloreak eta egokiagoa da “askatasuna, konstituzionalismoa eta foru erregimena defendatzeko”, “espazio ilusionagarria, irekia eta integratzailea” izateaz gain, “lidergo argi eta indartsua” duelako. Horrez gain, ez zaie egoki iruditu UPNk bere kabuz erabaki izana Navarra Suma koalizioa desegitea.

Albisteak erakusten du ez dela bukatu UPNren kargu edo militanteen galera, eta pentsatzekoa da, PPk iragarri duen gisan, hauteskundeak hurbildu ahala gehiago ere izango direla. UPNren eta PPren arteko tirabirak biziki areagotu dira azken hilabeteetan, lehenik iaz Carlos García Adanero eta Sergio Sayas UPNko diputatuak UPNtik kanporatu zituztenean, eta ondoren, UPNk erabaki zuenean maiatzaren 28ko udal eta foru hauteskundeetara bakarrik aurkeztuko zela.

García-Barberenak eta Alonsok Sayasi eman zioten sostengua 2020ko UPNren kongresuan, azken horrek alderdiaren lehendakaritza Javier Esparzari lehiatu zionean. Esparzak aise irabazi zuen orduan, baina bozka eman zuten 1.774 afiliatuetatik Sayasek lortu zituen botoen %41,71. Gaurtik ikusita bitxia bada ere, orduan García Adanero Esparzaren zuzendaritzako zerrendan joan zen; orain, PPko zerrenda burua izango da Iruñeko Udalean.

UPNko lehendakariak, hala ere, oraingo albisteak ez duela ezustean harrapatu adierazi du, “hemen denok ezagutzen dugu elkar”, eta lasai dagoela gehitu du: “Kezkatuta ikusten nauzue akaso?”. Baina badirudi kezkatua egoteko arrazoirik baduela, lehenago UPNrekin kargu esanguratsuak izan zituzten María Kutz, Luis Zarraluqui, Maribel García Malo eta Ruth Goñik ere PPrekin bat egin baitute. PPk asteazken honetan Baztanen egin duen ekitaldi batean, halaber, Begoña Sanzberro izan zen, UPNren sailburu eta parlamentari ohia.