Irakasleek (ere) aurreiritziak dituzte eta ikasleen notetan eragiten dute

  • Irakasleek nota hobea jartzeko joera dute klase altuko ikasleei, neskei eta, laguntze aldera, migratzaileen seme-alabei, baina epe luzera, migratzaileen seme-alaba horiengan espektatiba akademiko txikiagoak dituzte, baita baldintza sozioekonomiko okerragodun haurrengan ere. Hori dio Europako Batzordearen ikerketa batek. Halako aurreiritzi eta espektatibek elikatu dezakete eskola-porrota antzeko profiletan betikotzea.

"Idatzian ikasleak telebistako reality show bat aipatzen badu, Moneten koadro bat aipatzen badu baino nota txikiagoa jasoko du". Argazkia: Freepik

2024ko martxoaren 25an - 05:09

Ez da gauza berria: baldintza sozioekonomiko zailagoa duten familietako ikasleek oztopo handiagoak izan ohi dituzte hezkuntza ibilbidean aurrera egiteko. Kontua da, joera hori zenbateraino elikatzen dugun kontziente edo inkontzienteki, hasieratik aurreikusiz (eta transmitituz) hala izango dela.

1.717 ikasleren idatziak ebaluatzea eta ikasle horien inguruko espektatibak adieraztea eskatu diete hainbat irakaslegairi. Ebaluatzerakoan, bi faktorek eragina dutela nabarmendu dute ikerketan: batetik, ikasleak gelan duen jarrera. Gelan jarrera desegokia duen ikasleari nota baxuagoa jartzera jotzen dute irakasleek, eta jarrera desegokia errazago lotzen dute jatorri migratzaileko haurrekin eta baldintza sozioekonomiko kaskarragoetakoekin. Kurioski, aldi berean jatorri migratzaileko ikasleei nota jartzerakoan onberagoak izan direla ere antzeman du ikerketak, hizkuntzarekin moldatzeko zailtasunak izan ditzaketela ondorioztatzen baitute. Beste aurreiritzi batek ere eragina du notan, kapital kulturalak: “Idatzian ikasleak telebistako reality show bat aipatzen badu, Moneten koadro bat aipatzen badu baino nota txikiagoa jasoko du, eta hori kezkagarria da”, diote Irakasleen aurreiritziak ebaluazioan, ikasleari atxikitutako estatusaren arabera ikerketako egileek.

Nola eta zeren arabera ebaluatzen den eta ebaluazio horretan gizartean dauden eta irakasleek ere badituzten aurreiritziek zein eragin duten eztabaidatzea du helburu azterketak.

Aurrera begirako espektatibez galdetuta, ondorioa da jatorri migratzaileko ikasleengan eta etxean egoera sozioekonomiko zaila dutenengan arrakasta akademikorako aukera gutxiago ikusten dutela irakasleek.

"Magia dirudi, baina egiaztatuta dago irakasleak ikaslearenganako espektatiba onak baldin baditu, bete egingo direla, eta berdin espektatiba txarrekin"

Pigmalion efektua: betetzen diren espektatibak

Jakina da espektatibek ikasleengan duten eragin handia, bakoitzarengan jartzen dugun espektatibaren baitan ere badagoela arrakasta, eta beraz inportantea dela ikasle “on” eta “txar” gisako rolen aurrean, gure diskurtsoak aztertzea, espektatibak nola adierazten ditugun eta ikasleengandik zer espero dugun.

Haurrak ikasteko duen motibazioaren harira, “argi dago bere burua txartzat duen ikasleak ez duela inongo motibaziorik izango ikasteko. Horregatik, oso garrantzitsua da irakaslegaiek jakitea zenbaterainoko eragina dugun, irakasleok askotan betetzen den espektatiba egiten dugulako ontzat eta txartzat jotzen ditugun ikasleekin. Magia dirudi, baina egiaztatuta dago irakasleak ikaslearenganako espektatiba onak baldin baditu, bete egingo direla, eta berdin espektatiba txarrekin”, nabarmendu zuen Irene Lopez irakasleak, ARGIAko artikulu honetan.

Hezkuntza, arrakala sozialak birproduzitzen?

Errealitatea da ikasle batzuek eta besteek etxetik dakarten motxila ez dela berdina, baina hezkuntza sistema saiatzen da motxila horiek orekatzen, ala gizartean ematen diren zapalkuntza eta arazoak birproduzitzen ditu? “Gaur egun, duela urte batzuk baino gehiago gainera, eskolak mantentzen ditu pribilegioak dituzten umeen pribilegioak eta opresioak dituzten umeen opresioak. Diskurtsiboki denok diogu eskolaren funtzioa dela egoera hori orekatzea eta iraultzea, baina esango nuke gure egitekoekin hainbat eta hainbat kasutan egoera mantentzen dugula eta pribilegioak ez dituzten umeek segurtasun falta handiagoa dutela eskolan, dituzten beharrak ez direlako hain erraz onartzen”, zioen Agurtzane Martinez irakasleak, ARGIAn.

Finean, meritokraziaz eta espektatibez harago, “baldintza ekonomiko ugari ezkutatzen dira nota baten atzean: etxeko egoera zein den, klase partikularrak ordaindu ote ditzakezun, zure herriko azpiegiturak zein diren… Gurasoen laguntza jasotzea, baliabideak izatea, eskolaz kanpoko jardueretan aritzeko aukera izan eta harreman afektibo egonkorrak mantentzea, integratuta egotea… Horrek guztiak positiboki eragingo du ikaslearen hezkuntza prozesuan eta notetan, eta alderantziz”, azaldu zuten Ibai Berezibar eta Jon Arrieta ikasleek, ARGIAko beste artikulu honetan.


Kanal honetatik interesatuko zaizu: Hezkuntza
Neskak eta ikasketa zientifikoak: 6 urteetatik unibertsitatera bitarteko harreman gatazkatsua

Neskek gaitasun matematiko eta zientifikoekiko txikitatik duten pertzepzio, autopertzepzio eta bizipenen eraginez, zientzia arloko ikasketei muzin egin eta bestelako karrerak aukeratzen dituzte. Hala dio ikerketa berri batek.


Palestinaren aldeko unibertsitate-sarea

EHUk Tel Aviv-eko unibertsitatearekin etorkizuneko lankidetzarako bideak ahalbidetzen dituen zibersegurtasuneko katedra bat sortu izanaren harira, bertako langileok interpelatuak izan gara hainbat lekutatik, eta esan beharra dut neurri handi batean lotsatuta sentitu naizela,... [+]


2024-04-18 | Euskal Irratiak
Tulalaika besta, Xiberoako ikastolei bultzada emateko

Hirugarren urtez Xiberoako ikastolei bultzada emanen die Tulalaika bestak.


Errendimendu akademikoaren arabera banatuko dituzte ikasleak Ipar Euskal Herrian

Ongi doazen ikasleak talde batean, zailtasunak dituztenak, bestean; maila akademikoaren arabera banatuko dituzte ikasleak datozen ikasturtean, Frantziako Estatuan. Ikasleak sozialki eta akademikoki sailkatu eta bereiztea, desoreka areagotzea eta egoera okerragoan daudenak... [+]


Eguneraketa berriak daude