ARGIA.eus

2020ko azaroaren 25a

Ipar Euskal Herria barne, Frantziako estatu osoa konfinatuta ostiraletik abenduaren 1a arte

  • Astearte ilunabarretik filtratua azkenean egia gertatu da: Emmanuel Macron presidenteak asteazkenean, urriak 28, telebistaz egindako agerraldian iragarri du ostiralean hasi eta abenduaren 1. arte Frantziako estatuko herritar guztiak konfinaturik geratuko direla nor bere etxean, nahiz eta jarduera normalen etena joan den martxoko konfinamendukoa baino zerbait arinagoa suertatuko den. Ipar Euskal Herriko biztanleak ere itxialdiak harrapatzen ditu.

ARGIA @argia
2020ko urriaren 29a
Emmanuel Macron konfinamendua iragartzen telebistaz: "Gaina hartzen ari zaigu COVID-19aren bigarren uhina eta ongi dakigu hau hilgarriagoa suertatuko dela lehena baino".

Asteazken ilunabarrean telebistaz egindako hitzaldian Frantziako estatuan pandemiak egin duen bilakaeraren panorama gordina azaldu die herritarrei Emmanuel Macron lehendakariak: "Orain arte egindako ahaleginak baliagarriak izan diren arren, onartu beharrean gaude ez direla aski izan. (...) COVID-19a gaur Frantzian hartzen ari da aurreikuspen ezkorrenek ere sumatzen ez zuten abiadura. Atzo bertan gure 527 herrikide hil dira. Atzo ZIUetan 3.000 pertsona inguru geneuzkan sartuta, hau da, hartu ditzakegun guztien erdia baino gehiago. (...) Udan zehaztu genuen gure estrategia, zeina baitzen birusarekin batera bizitzea eta haren hedapena kontrolatzea baliatuz testeatzeko, ohartarazteko eta babesteko dauzkagun ahalmenak. Hori da egin duguna abuztuaz geroztik. Ondo egin ote dugu dena? Ez. Baina ahal genuen guztia egin dugu. (...) Testen ugaltzean arinago joan behar genuen hasieratik. (...) Orain gaina hartu digu, inguruko beste herrialde guztiei bezala, bapatean epidemiak hartu duen abiadurak, negua hubildu ahala azkartzen ari dela dirudien birusak. Europan denok gaude harrituta birusaren bilakaerarekin".

Eta jarraitu du: "Gaina hartzen ari zaigu COVID-19aren bigarren uhina eta ongi dakigu hau hilgarriagoa suertatuko dela lehena baino". (…) Edozer egiten dugula ere, azaroaren erdialderako 9.000 jende egongo da ZIUetan eta kutsaduren hedatzea irmoki gerarazten ez baldin badugu gure ospitaleak fite egonen dira saturatuak. (...) Inoiz ez dugu onartuko gure herritarren arteko ehunka mila hiltzen uztea. Horiek ez dira gure baloreak. Eta ez goaz horretara. Bigarren aukera bat litzateke soilik arrisku taldeetako jendeak konfinatzea baina bide hau ere ez da une honetan egingarria. Adineko jendeak soilik konfinatzea ez da eraginkorra, birusa gero eta arinago mugituko litzatekeelako eta mota larriagoetan. (...) Bestalde, batzuek aipatzen ari dira gure ZIUen harrera ahalmena zabaltzea orain hartu beharreko neurri gogorrak saihesteko bezala, eta horretan ere ari gara, baina horrekin ere ez diogu larrialdiari erantzuten".

Argudio horien ostean, Emmanuel Macronek laburbildu ditu ostiral goizean hasi eta hilabetez abenduaren 1a artean indarrean egongo diren neurriak. Epe horretan –baldin eta lehenago ez bada egoera nabarmen lasaitzen, aukera hori ere aipatu baitu presidentak– herritarrak nor bere etxean egonen dira konfinatuta Frantziako estatu osoan. Martxoko konfinamenduan ez bezala, oraingoan eskolak zabalik egonen dira eta lantokiak ere bai eta zahar-etxeetako bisitak ez dira etengo. Gainerakoan, joan den udaberrian bezala herritarrak irten ahal izango dira lanera edo ikastera joateko, medikuarekiko hitzordura iristeko, familiako bati laguntzeko, erosketak egiteko edo etxe inguruetan "haizea hartzeko". Horiek guztiak egiteko, irteeraren helburua markatuta eramango duen paperez horniturik joan beharko da.

Aipatu epean ostatu eta jatetxeak itxita egongo dira. Gertuko familiakoez gain beste inorekin elkartzea debekatuta geratu da Frantziako estatuan eta bilkura publikorik egitea ere bai. Lantokietan telelana ezarriko da ahal den guztietan eta irakaskuntzan goi mailako ikasketak Internetez jarraituko dira. Aldiz, bulego publikoak zabalik egongo dira, hilerriak zabalik egongo diren bezala. Orobat Europar Batasunako gainerako herrialdeekiko mugak ere, zabalik.

Neurriok kaltetuko dituzten enpresa eta langileentzako laguntza lerroak agindu ditu Macron lehendakariak. Eta gainerako xehetasunak Jean Castex lehen ministroak ostegun arratsaldean emanen dituela iragarri du.

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal hauetan artxibatua: Koronabirusa  |  Frantzia  |  Ipar Euskal Herria

Koronabirusa kanaletik interesatuko zaizu...





Azkenak
EGILEA
Argia buletina
Egunaren laburpena
zure e-postan
Eguneraketa berriak daude