Iñaki Arriola, irregulartasunaren itzala daraman kontseilari bat, berriz ere AHTren gidari
Iñigo Urkulluk bere exekutiboan egindako aldaketa nabarmenetako bat da Iñaki Arriola PSOE-EEko buruzagiarena. Lurralde Plangintza, Etxebizitza eta Garraio sailburu izango da hemendik aurrera. Zaldibarko hondamendiaren erantzukizuna saiheste aldera egindako mugimendua dela dio zenbaitek; baina askok ahaztu dute AHTren obretan hainbat irregulartasun gertatu zirela bera arduradun politiko nagusi zen garaian. Orain, Arriolak gidatuko du berriz azpiegitura faraonikoa.
Zaldibar, Zaldibar, Zaldibar. Iñigo Urkullu EAEko lehendakariarentzat eta bere kontseilarientzat amesgaizto politiko bilakatu zen hilabete luzez, bi langile eta herritar askorentzat benetako zorigaitza izandako zabortegiaren hondamendia. Iñaki Arriola buru zuen Ingurumen Sailean zentratu zituzten batzuek eta besteek begirada guztiak, Eusko Jaurlaritzaren bi bazkideen arteko barne borroka bat ere tartean zela.
Arriolak azalpen ugari eman behar izan zituen, Ingurumen kontseilari bezala, Verter Reciclyng enpresari emandako lizentziez, egin gabeko inspekzioez, hondakin industrialen kudeaketan izandako irregulartasunez… Duela egun gutxi jakin dugu kanpo auditoria batek errugabetu egin duela buruzagi sozialista, esanez bere sailak kontrol baldintzak bete zituela. Ikusi beharko da Europako Batzordeak zer dioen, auziaz egiten ari den ikerketa amaitzean.
Nolanahi ere, Arriola sailez aldatu eta Lurralde Plangintza, Etxebizitza eta Garraio sailburu izango da hemendik aurrera. Hedabide nagusiek Zaldibarko fokutik urruntzeko mugimendu gisa ulertu dute kargu aldaketa, bere irudia “desgastatu” duelako aferak. Ez dirudi gauza bera esan litekeenik duela urte batzuk gertaturiko beste eskandalu batekin.
“Ez dakit zertaz ari zaren”
Vocento taldeko egunkariek zuzeneko iturriak erabiliz azaldu dutenez, Arriolak AHTko obren gidaritza hartuko du berriz ere, Patxi Lopez lehendakari zen garaian egin bezala. Oraingoan, gainera, obra hori amaitzeko helburuz –2016rako EAEko hiriburuak konektaturik egongo zirela esan zuen, behinola–.
Arriola Etxebizitza, Herri Lan eta Garraio sailburu izan zen 2009-2012 agintaldian eta ordukoa da ‘Euskal Y’ delakoan izandako ustezko irregulartasun eta eskandalu handienetako bat, azkenean epaitegian ikertu gabe geratu zena. Beasain Ekialdeko AHTko obren zatian, %23ko gainkostuak atzeman zituzten, sekula egin ez zen miloi erdi euroko hormigoi-makina bat eta guzti.
AHTren obretako ustezko irregulartasun kasuaz galdetzean, Arriolaren erantzuna lehorra bezain iheskorra izan zen: “Ez dakit zertaz ari zaren, ezta zertaz ari den zuk aipatzen duzun albiste hori ere”
Gainkostuen berri 2015ean eman zuen Gara egunkariak, eta 2017an El Diario.es-ek argitaratu zuenez Ertzaintza eta Guardia Zibila elkarlanean aritu ziren ikertzen hilabete luzez, Arabako fiskalaren eskariz. Baina kasua Gipuzkoako fiskaltzara igaro zenean, honek egun gutxiren buruan itxi zuen diligentziarik egin gabe. Horren inguruan galdetuta, Arriolaren erantzuna, lehorra bezain iheskorra izan zen: “Ez dakit zertaz ari zaren, ezta zertaz ari den zuk aipatzen duzun albiste hori ere”.
Orain, Arriolak sail berria hartu orduko, goitik behera berrantolatu du, Vocentoren arabera, eta bere gertuko bat izendatu du makinista-ondoko: Pedro Marco de la Peña, zein eta Balzola eta Amenabar eraikuntza enpresetan zuzendari eta administratzaile izandakoa.
Eusko Jaurlaritzako Segurtasun sailburuaren arabera, gazteek ertzainei “bortizki eraso” zieten, eta “erabat gaitzetsi” ditu jokabideak.
Sindikatu deitzaileen arabera, ikasturte honetan Araba, Bizkaia eta Gipuzkoako sektore publikoan antolaturiko greben artean jendetsuena izan da asteartekoa, eta batez ere garraio publikoan, hezkuntzan eta udal esparruan izan du eragin handiena. Manifestazioetan 30.000 lagunek... [+]
Eusko Jaurlaritzak, sindikatuekin egindako bileran, hamar konpromiso hartu ditu. Bilera ontzat eman badute ere, hauteskundeak egitear direnez, denborarik eza azpimarratu dute sindikatuek. ENBAk adierazi du denbora gutxi dutela neurriak gauzatzeko, eta UAGAk nabarmendu du... [+]
Buruan foam jaurtigai batekin kolpea jasotako emakumeaz gain, bigarren pertsona bat zauritu zen Donostian asteartean ertzainek Realeko zaleen aurka egindako oldarraldietan. Ertzaintzak jakinarazi du kasu hau ere ikertzen ari dela.
Emakumea Donostia ospitalean ingresaturik dago, foam jaurtigaiak buruan jo eta odol isuria eragin ostean. Realaren eta Paris Saint Germainen arteko futbol partiduaren aurretik polizia agenteek egindako kargetan zauritu dute. Ertzaintzak barne ikerketa zabaldu duela jakinarazi... [+]