Osasuna ardatz

Eskolaratzean osasuna eta segurtasuna bermatu ezean, plantorako deia egin du LABek. Prebentzio plan adostua eskatu du, eta ikastetxeak irekitzean hauek egoera onean egongo diren bermea. Horretarako langile guztiei testak egitea eta maskarak eta behar diren segurtasun baliabideak ikastetxeei helaraztea eskatu dute LAB, STEILAS eta ELAk. Tenperatura hartzea eta ikastetxeen aurretiazko desinfekzioa gauzatzea ere beharrezkoa dela gogoratu du ELAk.

15 ikasleko bi gela kudeatu + tele-ikaskuntza?

Ikasgeletan ratioen jaitsiera egongo dela iragarri du Hezkuntza sailburuak, gelako 15 ikasle izango direla aurrerantzean. Ikasle kopurua jaitsiko bada, irakasle gehiago beharko direla adierazi dute sindikatuek, eta LABek nabarmendu du irakasle baten esku ezin dela egon bi gela kudeatu eta tele-ikaskuntzan dituen gainerako ikasleei arreta egitea.

Gainera, sindikatu horrek dio langileak era mailakatuan itzuli beharko direla, batzuk arrisku taldean izango direlako (diabetikoak, gaixotasun kardiobaskularra eta biriketakoak dituztenak, gaixo kronikoak, haurdunak, 60 urte baino gehiago dituztenak…) eta beste batzuek zaintza ardurak dituztelako etxean.

Giza-baliabideez gain, baliabide materialen inguruan ez hitz egin izana ere kritikatu dute sindikatuek. Eta ikasleei ikastetxerako garraioa bermatuko al zaien jakin nahi du STEILASek.

Haurreskolak, aparkaleku

Hiru sindikatuak bat datoz: haurreskolak ez lirateke ireki beharko eta kritika sakona egin diote Jaurlaritzaren planteamenduari. 0-1 urteko ikasleen kasuan, bi gurasoak etxetik kanpo lanean ari badira haurreskolara eraman ahal izango dute seme-alaba, eta ikuspegi horrek pedagogikotik gutxi eta haurreskolak “umeen aparkaleku” irudikatzetik asko duela kritikatu dute. Kontziliazioa bermatzeko bestelako alternatibak badirela argi dute sindikatuek, zaintzarako ordaindutako baimen bereziak ematea, adibidez.

Curriculuma, arrakala eta premia bereziko ikasleak

“Curriculumaren egokitzapenak egin beharko dira, zuzendaritza eta irakasleek horretarako bitarteko eta formazioa beharko dutelarik”, adierazi du LABek. Egokitzapen horretan, bereziki kontuan hartu beharko dira arrakala digitalaren ondorioz hezkuntza prozesuan atzera geratu diren ikasleak, eta horretarako diagnostikoa egitea eskatu du sindikatuak. “Guztiz utzita gelditu diren premia bereziko ikasleak” ditu buruan STEILASek: “Nola kudeatuko da horien buelta ikastetxeetara?”.

Datorren ikasturterako inolako aurreikuspenik gabe jarraitzen dutela gaineratu du ELAk.