Hiru soldadu estatubatuar hil eta 34 zauritu dituzte dron baten bidez egindako erasoan. Siria eta Jordaniaren arteko mugatik gertu, Jordaniako Defentsa Sareko 22. dorreko laguntza logistikoko basean gertatu da erasoa, AEBetako presidente Joe Bidenek igandean jakinarazi duenez. Irakeko Erresistentzia Islamikoak bere gain hartu du erasoa, Iranek, ordea, bere inplikazioa ukatu du.

Etxe Zuriak komunikatu bat zabaldu du, eta adierazi du “badakitela” nork burutu duen: “Eraso honen xehetasunak biltzen ari bagara ere, badakigu Sirian eta Iraken jarduten duten muturreko talde militanteek egin zutela”.

Jordaniako Gobernuko Komunikazio ministro Muhannad Mubaidinek adierazi duenez, ordea, Jordaniatik kanpo gertatu zen erasoa, eta Siriako Al Tanf basearen aurka zegoen zuzenduta.