Garbiñe Ubedak 'Hobe isilik' eleberria aurkeztu du

  • Garbiñe Ubeda idazle eta ARGIAko kazetariak Hobe isilik eleberria aurkeztu du gaur Donostiako Elkar aretoan. Lehen saialdia du fikzioaren munduan. Augustin Zubikarai beka-saria irabazi zuen iaz nobela-proiektu honek.


2013ko azaroaren 07an - 00:00
Azken eguneraketa: 2015-02-26 13:37:33
Ondarroako Udalak eta Elkar argitaletxeak antolatutako Augustin Zubikarai beka irabazi zuen iaz 'Hobe isilik'-ek

1936ko Gerran ibili eta gero, II. Mundu Gerraren amaieran Frantzian desagertutako Jose Bermejo aitona miliziano anarkistaren arrastoaren bila hasten da haren biloba Bakartxo. Inoiz ezagutu gabeko aitona hari idatziko balio bezala, bilaketaren gorabeherak, ezusteko aurkikuntzak eta horiek sorturiko zalantzak kontatzen dizkigu eleberriak; horiekin batera, familiaren historia berreraikiko du narratzaileak, baita hainbat gogoeta harilkatu ere: sekretuaz, isiltzeaz, bizitza berri bat hasteaz, zaharra ahazteaz…

"Gerra aipatu eta frontea etortzen zaigu gogora, milizianoak, tiroak, gorpu lehertuak, txikizioa, balentria belikoak", adierazi du aurkezpenean Ubedak. "Baina gerrak ere badu egunerokotasuna, badu eguneroko errutina, babarrunak eltzetik atera beharra, maitatzeko premia, edo seme-alabak aurrera atera beharra".

"Gerra garaiko egunerokotasunean biziraupena da funtsa, ahal bada zutik hil behar ez izatea; belauneko bada ere, bizitzea. Bizitzarik gabe ez dagoelako ezer. Bizitza baldin badago, esperantza ere badagoelako. Kosta ahala kostako biziraupen horren aldarria da Hobe isilik".

"Gure etxean bizi izandako historia du abiapuntua fikzio honek. Baina ez da biografia bat, ezta terapia egiteko hautatu dudan molde kamuflatu bat ere. Hainbat taburi hortzak erakusten saiatu naiz, baina ororen gainetik, nobela bat idaztea izan dut helburu".

"Memoria historikoa hitzetik hortzera darabilgu aspaldi honetan. Ezinbestekoa zaigu iragana argitzea, herri bezala eta norbanako bezala, esaerak ondotxo dioen moduan, atzeak erakusten baitu aurrea nola dantzatu".

"Arakatu beharra daukagu beraz, ezkutatu zaizkigun egiak bilatu. Eta arakatu behar horretan, luparen efektu engainariarekin egingo dugu topo. Lenteaz irudia zenbat eta gehiago handitu, orduan eta doiago ikusiko dugu fokatu dugun puntua, baina orduan eta lausoagoa bihurtuko da ingurua. Konexiorik gabe azalduko zaigu ikusten ari garen hori, solte, isolatuta, eta epaitu egingo dugu, gure gaurko begiekin, gure erosotasunetik juzkatuko dugu. Ekidin ezina zaigu".

"Eta halako batean, lupa urrundu egin beharko dugu berriro, xehetasun fokatu horiek apur bat lausotuko bazaizkigu ere, ingurua ager dadin ikuspegian. Testuingurua delako, hain zuzen, hain doi eta zehatz ikusi nahi izan dugun puntu horren azalpen nagusia, neurri handi batean gure epai guztiak baldintzatuko lituzkeena: gerra bere gordinean".

Garbiñe Ubedaren artikuluak ARGIAN.

Garbiñe Ubedaren bloga.

 


Irakurrienak
Matomo erabiliz
Azoka
Kanal honetatik interesatuko zaizu: Euskal literatura
Otsoa dator!

Gizakiak istorio kontatzaileak gara, hainbeste, ezen esan ere egin daitekeen narrazio gaitasuna dela gizaki egiten gaituen ezaugarrietako bat. Kontakizunak behar beharrezkoak zaizkigu geure burua eta errealitatea eraikitzeko, eta bereziki aipatzekoa da ipuin klasikoek horretan... [+]


Uxue Alberdi. Hamarkada bi idazten (I)
Aulkitik aulkira, euli-giro eta Jenisjoplin, kontrako eztarritik dendaostera

Uxue Alberdiren lanari begira jarriko gara oraingoan. Lehenengo artikulu honetan helduentzako idatzi dituen ipuinak, eleberriak, saiakera eta kronika hartuko ditugu kontuan. Bigarren artikulu batean ilustratutako anekdotez, istorioez, filosofia liburuez eta idatzizko bertsoez... [+]


2024-02-12 | Jakoba Errekondo
Indi gaztainondoaren gerrateak

Zuloan sartuta egotea ez duk txarrena –esan zion Manuk–, txarrena duk ez jakitea noiz aterako haizen, edo inoiz aterako haizen ere. Lander Garroren Gerra Txikia nobelan, non gerra bateko iheslarien gorabeherak azaltzen dituen, pertsonaien artean, Anna Frank dakarte... [+]


2024-02-06 | Estitxu Eizagirre
Gorka Setien idazlea hil da

Gorka Setien Berakoetxea poemagile hernaniarra hil da otsailaren 4tik 5erako gauean. Bost liburu idatzi zituen, irrati libreetako ahotsa izan zen eta gozo entzuten eta zaintzen zekien. 2019an autoedizioan argitaratu zuen bere poema liburu berriena, Naufragoen altzoa.


Eguneraketa berriak daude