Asteartean, Mikel Jauregi Eusko Jaurlaritzako Industria sailburuak berretsi du Ayesa IT konpainia teknologikoa erosiko dutela. Jaurlaritzarekin batera, BBK-k eta Kutxabankek osatu duten partzuergoak konpainiaren akzioen %70 erosiko du. Xehetasun gutxi batzuk lotzea falta da, besteak beste, Vital banku fundazioa partzuergoko kide izango den ala ez jakitea. Hala ere, hori ez litzateke traba izango operazioa gauzatzeko, Jaurlaritzak adierazi duenez. Gauzak honela, partzuergoko kideek 277 milioi euro jarriko dituzte: BBK-k eta Kutxabankek 100na milioi, eta Jaurlaritzak 70. Bazkide horiei Teknei enpresa gehituko zaie, baina sozio industrial modura. Hala ere, ez da baztertzen azken horrek ere partaidetza txikiren bat izatea.

Jauregik azaldu du Ayesaren salerosketak hainbat fase dituela. Enpresa erosteko hautagaien lehian partzuergoak irabazi ostean, taldeak akzioak saltzeko prest dagoen Erresuma Batuko AMCE funtsarekin akordioa egin beharko du. Azken fasean, akziodunen artean aldaketak egin daitezke, eta hor sartuko litzateke Vital, Jauregiren arabera.

Eztabaida dago Ayesa erostearen erabakia zuzena den ala ez. Kutxa fundazioak iritzi du arrisku handiko operazioa dela, argudiatuz sektorean “lehia handia” dagoela eta Ayesak ez duela “eredu berezirik” eskaintzen horretan aritzeko. Jaurlaritzaren ustez, ordea, hitz horiek “burutazioak” besterik ez dira, eta argi dute “operazio estrategiko on bat” dela erosketa. Jauregik ziurtasunez hitz egin du: “Hemen badauzkagu Ayesak behar dituen talentua eta bezeroak”, eta enpresa teknologikoak Jaurlaritzaren plan industrialaren “bihotza” direla nabarmendu du. 

Azkenik, Jauregik gogorarazi du Ayesak Hego Euskal Herrian 2.000 lanpostu baino gehiago dituela, eta nabarmendu du lanpostu horiek arriskuan egon zitezkeela euskal partzuergoak eskaintzarik egin ez balu eta enpresa kanpoko funts baten esku geratu izan balitz.