“Ertzainak oso zakar etorri ziren, gu oso gutxi ginen eta lekukorik ez zegoen han. Hasieratik obsesionatu ziren ezer graba ez genezan, eta guk ere, ordura arte egiten ari ginen grabazioa moztu genuen. Autoa erregistratzen hasi zirenean, gutako kide batek esan zien eskubidea zuela ikusteko erregistroa eta besterik gabe, borrakada bat eman zioten, oraindik arrastoa du”, kontatu diote ARGIAri.

Ekimenaren ostean, identifikazioak eta erregistroa amaitutakoan, 00:15 inguruan, bost kideak autoan sartu eta etxera itzultzen hasi zirenean, Martuteneko errepide nagusira irtetear zirela, ertzain batek kanpotik borrakada indartsu bat eman eta autoko leiho bat txikitu zien. “Ez sinestekoa zen eta erreakzionatu genuenerako, ertzainak beren autoetan sartu eta ihes egin zuten".

Ertzaintzari jakinarazia zioten

Oñatiko gaztetxetik elkar ezagutzen duten bost pertsonak urte berri on esateaz gain, animoak eman nahi izan zizkieten Donostiako Martuteneko espetxean dauzkaten euskal preso politikoei. Ertzaintzari jakinarazi zioten hamabost egun lehenago kontzentrazio bat egingo zutela 23:15 – 00:15 bitartean espetxe kanpoan, eta hala, elektrizitate sorgailua, bi bafle, mikrofono bat eta musikaz kargatuta agertu ziren hara.

Beldur ziren hara iristean, patruilaren bat edo zain izatea eta esatea kontzentrazioa egin zezaketela baina megafoniarik gabe. Ez zen inor agertu, ordea, eta ordu erdiz aritu ziren musika jarri eta presoei oihuak botatzen.

Abestitik abestira bolumena jaisten zutenean, barruko presoen oihuak entzuten zituztela oroitzen dute. “Ordu erdiz aritu ginen esaten maite ditugula. Nahiz eta ordubeteko baimena izan, gure asmoa zen gauerdia arte irautea, batez ere, ez lata gehiegi ematearren eta 00:00etan presoei zuzendutako irratsaio bat hasiko zelako. Azken abestia amaitzeko minutu bat falta zela, Ertzaintzaren bi patruila ziztu bizian iritsi ziren, derrapatuz sartu eta nahiko era bortitzean etorri ziren. Ostikoz bafleak bota eta musika eten zuten. Esan genien baimena genuela hor egoteko eta protesta egiteko, baina alferrik: moztera etorri ziren. 'Baimena baduzue protesta egiteko, baina ez guateke hau montatzeko', esan ziguten".

“Nabari zen haserre zeudela, agian ertzain horiek espero zuten urte berrira sartzea Ertzain-etxean, baina guregana etorri behar izan zuten...", borobildu dute gertaera umorez.