Arabako herritarren %75a bizi den Gasteizen lehia EAJ eta EH Bilduren artekoa izango zela aurreikusten zuten inkestek, baina EH Bildu eta PSEren artekoa izan da azkenik. Rocio Viteroren zerrendak 1.000 boto eskasen aldeari esker irabazi du; EH Bilduk 7 zinegotzi eskuratu ditu, eta PSEk 6 (2019ko zinegotzi kopurua berdinduta); seina lortu dituzte ere PPk (bat irabaziz) eta EAJk (bat galduz), koska bat beherago geratu badira ere. Podemosen inguruko koalizioak 2 zinegotzi lortu ditu. Uneotan zaila da antzematen nork eskuratuko duen alkatetza, eta nola osatuko den udal gobernua.

Laudion (17.000 biztanle) eta Agurainen ere (5.000) EH Bilduk lehen postua kendu dio EAJri, bietan emaitzak irauliz alde oso txikiagatik: Laudion EAJk baino 29 boto gehiago eta 7 zinegotzi eskuratu ditu koalizioak (2 gehiago), eta EAJk 6 (bat gutxiago); Agurainen 55 botoren aldea atera dio EAJri, 7 zinegotzi eskuratuz (bat gehiago), EAJk galdu duen zinegotzia (6). Amurrio izan da EAJk mantentzea lortu duen udalerri handi bakarra (10.000 biztanle), 2019ko emaitzak errepikatuta: EAJk 8 zinegotzi eskuratu ditu, eta EH Bilduk 7.

Iruña Okan (3.500) denak berdin jarraitzen du. Historikoki PSEri botoa ematen dion udalerian alderdi horrek jaso du babes gehien eta 4 zinegotzi lortu ditu; EAJk 3; eta EH Bilduk 2.

Oionen, Arabar Errioxako udalerri populatuenean (3.400), irauli ikusgarria gertatu da: EH Bilduk 5 zinegotzi lortu ditu 3 irabazita, zerrenda bozkatuena izateari utzi dion EAJren kaltetan (3 zinegotzi, bat galduta). Ikusi beharko da zer paktu gertatzen diren, PPk 2 zinegotzi eskuratu baititu (2019an bezala) eta PSEk 1 (bat galduta).

Dulantzin (3.000 biztanle) EAJ izan da lehen postua eskuratu duena (5 zinegotzi, bi gehiago) kandidatura independenteari irabazita (4 zinegotzi, 2019ko emaitza berak).

Trebiñuko konderriari dagokionez, Trebiñu herrian hautagaitza independenteak eskuratu du berriz ere gehiengo absolutua, zinegotzi kopurua errepikatuta (6). Argantzunen, 2019an garaipen historikoa eskuratu zuen ezker subiranistak legez Burgoseko lurraldea den konderrian, baina 2023an, EH Bilduk zinegotzi kopuru bera eskuratu badu ere (3), EAJk lortu du lehen postua eta gehiengo absolutua (4 zinegotzi, bat gehiago).

EH bildu hauteskundeetako garaile, EAJ lehen indarra udal gehiagotan

Zalantzarik gabe EH Bildu izan da Arabako udal hauteskundeen irabazle nagusia. Botoetan gora egiteaz gain lau udalerri populatuenetatik hirutan izan da lehen indarra, eta lehenbiziko aldiz da indar bozkatuena Gasteiz hiriburuan: garaipen historikoa. Txanponaren beste aldea da EAJ, galtzaile nagusia, bereziki Gasteizko emaitzengatik baina baita Agurain edo Laudion bigarren geratzeagatik ere. PSEk eutsi egin dio oro har, eta PP zerbait igo da. EAJ izan da lehen indarra udalerri gehienetan (25), EH Bildu bigarrena (17), PSE hirutan eta PP bitan.

Abstentzioa gora

Emandako botoek ez ezik eman ez direnek ere baldintzatu dute emaitza. Gasteizen, 2019rekin alderatuta, botoak galdu dituzte PSEk, PPk, EAJk zein Elkarrekinek. EH Bildu izan da gora egin duen bakarra, oso modu apalean (300 boto). Araban, boto galera izan dute EAJk, PSEk eta Elkarrekinek: eta irabazi EH Bilduk (3.000), PPk (1.000) eta Voxek (2.200). Abstentzioak %17a egin du gora Araban (%34tik %40ra), azken urteetako joera baieztatuz. Bozkatzeko eskubidea ez duten milaka arabar adin nagusiak alde batera utzita, 10 herritarretatik 6 joan dira hautetsontzietara, eta 4 ez.