Nerea Kortajarena legebiltzarkideak emandako datuen arabera, Osasun Sailak 2.792 milioi euro erabili ditu aurten irailaren 30era arte, esperotako aurrekontuaren %70,6. 2019an, garai berean, 2.934 miloi gastatu ziren, aurrekontuaren %74,2. "Pandemia bat bizitzen ari gara eta Osasun Sailak 142 milioi gutxiago gastatu ditu", azpimarratu du. Hezkuntza saila ere, koronabirusaren gaitzak kolpatu duen alorretako bat izan da, eta egoera berrietara moldatu behar izan da. Iaz Hezkuntza Sailak 2.116 milioi gastatu zituen irailaren 30ean, aurrekontuaren %74,1. Aurten 63 milioi gehiago gastatu ditu, 2.179raino, baina aurrekontuaren ia ehuneko bera da, %74,2.

EH Bilduk salatu duenez, "COVID-19a kolpe gogorra eta gainkarga izan da jada ahulduta zegoen Osakidetzarentzat, baina aurrekontu berarekin eta nahikoak ez diren bitartekoekin egin behar zaio aurre". Eta bere ustez gainera, "langileak nekatuta eta haserre daude, eta baldintza horietan normala da Osakidetzaren egoera geroz eta prekarioagoa izatea". 

Legebiltzarkideak ziurtatu duenez. Osasun sailean, EH Bildu alderdiak koronabirusak duen garrantzia lehenetsita egin beharko zela uste duen arren, bestelako gaixotasunak pairatzen dituzten pazienteak ere sendatu behar direla adierazi dute, eta horretarako, beharrezko baliadibeak jarri. "Gaixotasun honekin zerikusirik ez duten guztiak bete gabe geratzen dira: kontsultak eta operazioak atzeratzen dira, gaixotasun kronikoak dituzten pertsonen jarraipena ez da behar bezala egiten", adierazi dute. 

Alderdi independentistak gogorarazi duenez, "Espainiako Gobernuak COVID funts bat onartu zuen, eta EAEri 328 milioi euroko finantzaketa aitortu zion lehen zatian, eta 87 milioikoa hirugarrenean. Lehenengoaren helburua osasun gastuei aurre egitea da, eta hirugarrenarena hezkuntza gastuei" aurre egitea. Horren aurrean, Kortajarenak honako galdera hau egin du: "Zein da, beraz, Eusko Jaurlaritzaren ahalegina pandemia honi aurre egiteko? Nola liteke egoera honetan osasun eta hezkuntza sailak aurrekontu berarekin funtzionatzea? ".

EH Bilduk Iñigo Urkulluren Gobernua salatu du, eta aurrekontuekin eta jasotako diruarekin zer egin duen argitzeko eskatu. Alderdiak, ez du ulertzen zeri itxaroten dagoen Jaurlaritza, bien bitartean, herritarrak, autonomoak, ostalariak, merkatariak eta familiak bigarren olatu hau etengabe jasaten ari diren bitartean. Esfortzu ekonomikoa eskatu dio lehendakariari.